उल्हासनगर, ता. २४ (वार्ताहर) : शहरातील गजबजलेल्या आणि वस्तीशी लागून असलेल्या रिजन्सी अँटीलिया संकुलाच्या शेजारील कागदी पुठ्ठा, फायबर मटेरियल व भंगार साठवणाऱ्या गोदामाला शनिवारी (ता. २४) सकाळच्या सुमारास भीषण आग लागल्याची घटना समोर आली आहे. काही मिनिटांतच आगीने उग्र रूप घेत संपूर्ण परिसरात धुराचे लोळ पसरले होते. यामुळे नागरिकांमध्ये घबराट पसरली होती.
गोदामात मोठ्या प्रमाणात कागद, पुठ्ठे आणि इतर ज्वलनशील साहित्य असल्यामुळे आग वेगाने पसरली. आगीची तीव्रता इतकी होती की काही मिनिटांतच संपूर्ण गोदाम जळून गेले. घटनास्थळी पोहोचलेल्या उल्हासनगर महापालिकेच्या अग्निशमन दलाच्या चार, कल्याण डोंबिवलीची एक आणि सेंच्युरी कंपनीची एक गाडी यांनी तातडीने पाण्याचा मारा करत आग विझवण्याची मोहीम सुरू केली होती. स्थानिकांच्या म्हणण्यानुसार, सकाळच्या वेळेस अचानक धुराचे लोट आणि आगीच्या ज्वाळा पाहून नागरिकांनी घटनास्थळी धाव घेतली. अग्निशमन दलाच्या जवानांनी गोदामालगत असलेल्या इमारतींना आगीची झळ लागू नये, म्हणून आगीचा फैलाव रोखण्याचा प्रयत्न केला.
दरम्यान, आगीचे नेमके कारण अद्याप स्पष्ट झालेले नसले, तरी प्राथमिक अंदाजानुसार शॉर्टसर्किटमुळे लागल्याची शक्यता वर्तवली जात आहे. या आगीत कोणतीही जीवितहानी झालेली नाही; मात्र गोदामातील मालाचे मोठ्या प्रमाणावर नुकसान झाले आहे. घटनेनंतर महापालिका प्रशासन, अग्निशमन विभाग, पोलिस अधिकारी आणि स्थानिक प्रतिनिधी घटनास्थळी उपस्थित होते. संपूर्ण प्रकरणाचा तपास सुरू केला असून, यानिमित्त रहिवासी वस्तीतील सुरक्षा व्यवस्थेवर प्रश्नचिन्ह निर्माण केले आहे.