विजेचा झटका लागून तरुण जखमी
उल्हासनगर, ता. २४ (वार्ताहर) : उल्हासनगर कॅम्प-३ येथील काजल पेट्रोलपंपाजवळील कृष्णा ट्रान्सपोर्ट येथे शुक्रवारी (ता. २३) दुपारी काम करीत असलेल्या तरुणाला हायव्होल्टेज विजेचा जोरदार झटका बसल्याची धक्कादायक घटना घडली. या अपघातात संतोष आढाव नावाचा तरुण गंभीर जखमी झाला असून, त्याला तातडीने उपचारासाठी मुंबईतील रुग्णालयात हलवण्यात आले आहे.
शुक्रवारी दुपारी १ वाजण्याच्या सुमारास संतोष आढाव कृष्णा ट्रान्सपोर्टच्या इमारतीच्या छतावर प्लास्टिक शीट टाकण्याचे काम करीत होता. या वेळी त्याचा अचानक संपर्क छताच्या वरून जाणाऱ्या उच्चदाब वीजवाहिनीशी झाला आणि त्याला तीव्र विजेचा धक्का बसला. विजेचा झटका इतका जोरदार होता की तो जागेवरच बेशुद्ध झाला. अपघात होताच परिसरातील स्थानिक नागरिकांनी तत्परता दाखवत संतोषला छतावरून सुरक्षितपणे खाली उतरवले आणि जवळील मॅक्स लाइफ हॉस्पिटलमध्ये दाखल केले. दरम्यान, प्राथमिक उपचारानंतर डॉक्टरांनी त्याची स्थिती अत्यंत चिंताजनक असल्याचे सांगितले आणि पुढील उपचारासाठी तात्काळ मुंबईच्या रुग्णालयात नेण्यात आले.