अभिनेते मुकुल देव यांचे निधन
मुंबई, ता. २४ : ‘सन ऑफ सरदार’, ‘आर... राजकुमार’, ‘जय हो’ यासारख्या लोकप्रिय चित्रपटांतून ओळख निर्माण करणारे अभिनेते मुकुल देव (वय ५४) यांचे आजारपणामुळे निधन झाले. गेल्या काही काळापासून प्रकृती अस्वास्थ्यामुळे त्यांच्यावर उपचार सुरू होते. त्यांनी शनिवारी अखेरचा श्वास घेतला. त्यांच्या निधनामुळे बॉलीवूडमध्ये शोककळा पसरली आहे.
मुकुल देव यांनी १९९६ मध्ये ‘मुमकिन’ या दूरदर्शनवरील मालिकेतून अभिनय क्षेत्रात पदार्पण केले. त्यांनी हिंदीसह पंजाबी, बंगाली, मल्याळम, कन्नड आणि तेलुगू भाषांतील विविध ६० चित्रपटांमध्ये भूमिका साकारल्या. अभिनयासोबतच त्यांनी काही प्रोजेक्ट्ससाठी लेखन आणि निर्मितीतही सहभाग घेतला होता.
चित्रपटांव्यतिरिक्त त्यांनी ‘२१ सरफरोश’ (२०१८) या टीव्ही मालिकेत गुल बादशाह आणि ‘स्टेट ऑफ सीज : २६/११’ (२०२०) या वेबसीरिजमध्येही महत्त्वाची भूमिका साकारली होती. २०२२ मध्ये प्रदर्शित झालेल्या ‘अँट द एंड’ या हिंदी चित्रपटात ते शेवटचे झळकले होते. प्रसिद्ध अभिनेते राहुल देव यांचे ते बंधू होते. अभिनेत्री दीपशिखा नागपाल यांनी सोशल मीडियावर मुकुल यांच्या निधनाबाबत माहिती दिली. अनेक सेलिब्रिटींसह चाहत्यांनीही सोशल मीडियावर त्यांना श्रद्धांजली अर्पण केली.
--
फोटो - MUM25E91052