रेसकोर्सवरील थीम पार्कच्या जागेचा काम होईपर्यंत कार्यक्रमांसाठी वापर
पालिकेच्या तिजोरीत पाच महिन्यांत आठ कोटी जमा
सकाळ वृत्तसेवा
मुंबई, ता. २५ ः   थीम पार्क उभारण्यासाठीची प्रक्रिया पूर्ण होईपर्यंत महालक्ष्मी येथील रेसकोर्सची १२० एकर जागा व्यावसायिक कार्यक्रमांसाठी (इव्हेंट) देण्याचा निर्णय पालिकेने घेतला आहे. मागील पाच महिन्यांत चार मोठ्या व्यावसायिक कंपन्यांचे या जागेवर  कार्यकम झाले. या कार्यक्रमांच्या शुल्कातून पालिकेच्या तिजोरीत सुमारे आठ कोटींचा महसूल जमा झाला आहे. या महसूलातून या जागेच्या देखभालीसाठीचा खर्च केला जाणार जाणार असल्याची माहिती सूत्रांनी दिली.
नोव्हेंबर २०२४ नंतर ही जागा शुल्क आकारून कार्यक्रमांसाठी दिली जात आहे. यासाठी दिवसाला १२ लाख १५ हजार रुपये शुल्क घेतले जात आहे. महालक्ष्मी येथील रेसकोर्सवरील १२० एकर जागा वेस्टर्न इंडिया टर्फ क्लबकडून जून २०२४ ला पालिकेच्या ताब्यात आल्यानंतर या जागेवर सेंट्रल पार्क उभारण्याचा मार्ग मोकळा झाला आहे. याबाबत सध्या आराखडा व इतर प्रक्रिया सुरू आहे.
कोणतेही बांधकाम न करता सेंट्रल पार्क उभारले जाणार आहे. तयार केल्‍या जाणाऱ्या आराखड्यामध्ये रेसकोर्सची १२० एकर आणि कोस्टल रोडची सुमारे १८० एकर जागा मिळून एकूण ३०० एकर जागा उपलब्ध असेल. यात संपूर्ण हिरवळीसह, चालण्यासाठी आणि बसण्यासाठी जागा आदी सुविधा तयार करण्यात येणार आहेत. ताब्यात आलेल्या १२० जागेवर थीम पार्क उभारले जाणार आहे. याची प्रक्रिया सुरू असल्याने ही जागा मोकळी आहे. १२ नोव्हेंबर २०२४ पासून या प्रस्तावित थीम पार्कची जागा कार्यक्रमासाठी दिली जात आहे. एका कार्यक्रमासाठी प्रत्येक दिवशी सुमारे १२ लाख ५० हजार रुपये आकारले जात आहेत.

महसूलवाढीसाठी...
रेसकोर्सवरील १२० एकर जागेवर थीम पार्क उभारले जाणार आहे, मात्र अंतिम मंजुरी मिळेपर्यंत ही जागा वापराशिवाय पडून राहण्यापेक्षा व्यावसायिक कार्यक्रमांसाठी शुल्क आकारून देण्याचा निर्णय घेण्यात आला आहे. मागील पाच महिन्यांपासून येथे कार्यक्रम होत आहेत. पावसातून कार्यक्रम बंद असतील. दिवाळीत पुन्हा ही जागा कार्यक्रमासाठी भाड्याने दिली जाणार असल्याचे सांगण्यात आले.

२० टक्के अनामत रक्कम
कार्यक्रमाच्या तयारीसाठी संबंधितांना ही जागा आधी द्यावी लागते. तीन ते दहा दिवस ही जागा आयोजकांच्या ताब्यात राहते. कार्यक्रमानंतर ही जागा सुस्थितीत ठेवणे आवश्यक आहे, मात्र कार्यक्रम झाल्यानंतर त्याकडे दुर्लक्ष होऊ शकते. कार्यक्रमादरम्यान या जागेची नासधूस होऊ शकते. त्यामुळे ही जागा पूर्वस्थितीत करण्याची जबाबदारी संबंधित कार्यक्रम आयोजकांकडे देण्यात आली आहे. यासाठी २० टक्के अनामत रक्कमही आकारली जाते.