पनवेल, ता. २५ (वार्ताहर) : शेअर ट्रेडिंगमध्ये नफ्याचे प्रलोभन दाखवून एका महिला डॉक्टरची ११ लाख रुपयांची फसवणूक केल्याची घटना उघडकीस आली आहे. सायबर टोळीने महिला डॉक्टरला १० लाख रुपयांचे कर्ज दिल्याचे भासवून कर्जाची रक्कम न भरल्यास सेबीचे लोक तिच्या घरी येतील, अशी भीती दाखवून तिच्याकडून पैसे उकळले. सायबर पोलिसांनी या टोळीविरोधात गुन्हा दाखल करून त्यांचा शोध सुरू केला आहे.
फसवणूक झालेली ३४ वर्षीय महिला डॉक्टर कळंबोली राहण्यास असून, ३० मार्च रोजी त्यांनी फेसबुकवर आलेल्या सी. ए. रचना रानडे यांच्या पोस्टवरील लिंकवर क्लिक केले होते. त्यानंतर त्या एका व्हॉट्सॲप ग्रुपमध्ये सामील झाल्या. सुरुवातीला त्यांनी १० हजार रुपयांची गुंतवणूक केल्यानंतर त्यांना काही प्रमाणात फायदा झाल्याने त्यांचा विश्वास बसला. त्यानंतर त्यांनी आणखी एक लाख रुपये गुंतवले. त्यानंतर सायबर टोळीने डॉक्टरला कमीत कमी १० लाख रुपये गुंतवण्याचा सल्ला दिला; मात्र डॉक्टरने त्यांच्याकडे इतकी रक्कम नसल्याचे सांगितले असता, एसएमसी सिक्युरिटीज त्यांना कर्ज देऊ शकते, असे सांगून सायबर टोळीने त्यांच्या ट्रेडिंग अकाउंटवर १० लाख रुपये जमा केल्याचे भासवले. त्यानंतर सायबर टोळीकडून त्यांना कर्जाची परतफेड करण्यास सांगण्यात आले.
----------------
धमकी देत उकळले पैसे
डॉक्टरने त्यांच्या ट्रेडिंग अकाउंटवर जमा झालेल्या रकमेतून कर्जाची रक्कम भरणार असल्याचे सांगितले असता, त्यांना वैयक्तिक पैसे भरावे लागतील, असे सांगण्यात आले. ही रक्कम त्यांना भरावीच लागेल अन्यथा त्यांच्याकडे सेबीचे लोक चौकशीसाठी येतील, अशी धमकी दिली. त्यामुळे या डॉक्टरने घाबरून सायबर टोळीने दिलेल्या वेगवेगळ्या बँक खात्यावर १० लाख रुपये पाठवून दिले. या प्रकाराची माहिती आपल्या पतीला सांगितल्यानंतर सायबर टोळीकडून तिची फसवणूक करण्यात येत असल्याचे सांगितले. त्यानंतर या महिला डॉक्टरने सायबर पोलिस ठाण्यात तक्रार दाखल केली.