मुलुंडमध्ये सांगीतिक अभिवाचनाचा कार्यक्रम
मुलुंड, ता. २५ (बातमीदार) ः स्वातंत्र्यवीर सावरकर साहित्य अभ्यास मंडळ, मुंबई यांच्या वतीने स्वातंत्र्यवीर सावरकर जयंतीच्या पूर्वसंध्येला ‘मी... येसूवहिनी’ या प्रयोगाचे आयोजन करण्यात आले आहे. विशेष म्हणजे सतीसावित्री सारख्या येसूवहिनी आणि स्वातंत्र्यवीर सावरकर यांच्यातील दीर भावजईच्या पवित्र नात्याचे बंधन या माध्‍यमातून उलगडून दाखवण्यात येईल. या कार्यक्रमामध्ये वीणा गोखले, संजय गोखले आणि विनोद पावशे अभिवाचन करणार असून, सूत्रधार म्हणून दिलीप ठोसर काम पाहणार आहे. गीतगायन संगीता ठोसर यांचे असून, संहिता लेखन डॉ. चित्रलेखा पुरंदरे यांचे आहे. हा कार्यक्रम मंगळवारी (ता. २७) महाराष्ट्र सेवा संघाच्या सभागृहामध्ये सायंकाळी ६ ते ८च्या दरम्यान पार पडणार असून, प्रवेश मोफत आहे. सर्व नागरिकांनी या कार्यक्रमात उपस्थित राहावे, असे आवाहन आयोजकांनी केले आहे.