‘वंदे भारत’, ‘वलसाड-दाहोद’ २७ मेपासून धावणार
पंतप्रधानांच्या हस्ते उद्‍घाटन

सकाळ वृत्तसेवा
मुंबई, ता. २५ :  पश्चिम रेल्वे मार्गावरील प्रवाशांसाठी साबरमती-वेरावल वंदे भारत एक्स्प्रेस आणि वलसाड-दाहोद एक्स्प्रेस या दोन महत्त्वाच्या गाड्या २७ मे २०२५ पासून नियमितपणे धावणार आहेत. या दोन्ही सेवांचा शुभारंभ पंतप्रधान नरेंद्र मोदी २६ मे रोजी दाहोद येथून व्हिडिओ कॉन्फरन्सिंगद्वारे हिरवा झेंडा दाखवून करणार आहेत.
पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, ट्रेन क्रमांक २६९०१/०२ वंदे भारत एक्स्प्रेस साबरमती ते वेरावल मार्गावर गुरुवार वगळता दररोज धावेल. ट्रेन  क्र. २६९०१ ही साबरमतीहून सकाळी ५.२५ वातजा सुटून दुपारी १२.२५ वाजता वेरावलला पोहोचेल. त्याचप्रमाणे ट्रेन क्र. २६९०२ वेरावलहून दुपारी २.४० वाजता सुटून रात्री ९.३५ वाजता साबरमतीला पोहोचेल. या गाडीत एसी चेअर कार व एक्झिक्युटिव्ह चेअर कारचा समावेश आहे. दुसरीकडे वलसाड-दाहोद मार्गावर नवीन एक्स्प्रेस सेवा सुरू होत असून, उद्घाटन विशेष गाडी क्र. ०९०११ वलसाडहून २६ मे रोजी सकाळी ११.३० वाजता सुटून संध्याकाळी ५.२५ वाजता दाहोदला पोहोचेल. या गाडीत एसी चेअर कार, सेकंड क्लास सिटिंग आणि जनरल कोच असतील. ट्रेन क्रमांक १९०११/१२ वलसाड-दाहोद एक्स्प्रेसची नियमित सेवा २७ मेपासून सुरू होईल. वलसाडहून पहाटे ५.१५ वाजता सुटून गाडी सकाळी ११.०५ वाजता दाहोदला पोहोचेल. परतीची गाडी दाहोदहून ११.५५ वाजता सुटून रात्री ८.०५ वाजता वलसाडला पोहोचेल.