उलवेतील विवाहितेच्या हत्या प्रकरणातील आरोपी गजाआड
उत्तर प्रदेशमधील नोएडा येथून पोलिसांची धरपकड
नवी मुंबई, ता. २५ (वार्ताहर) : उलवेतील २७ वर्षीय विवाहितेच्या हत्या प्रकरणातील फरार असलेल्या दोन्ही आरोपींना पोलिसांनी गजाआड केले आहे. सुखबीर निर्मलसिंग राठिया ( वय २४) व गुरुप्रीत अवतार सिंग ( वय २५) अशी या आरोपींची नावे आहेत. गुन्हे शाखेच्या पथकाने या दोघांना उत्तर प्रदेशमधील नोएडा येथून ताब्यात घेतले आहे. तसेच त्यांना लवरकच नवी मुंबईत आणले जाणार आहे. चार दिवसांपूर्वी पोलिसांनी या हत्या प्रकरणातील मृत विवाहितेचा पती व त्याच्याकडून हत्येची सुपारी घेणाऱ्या दोन महिलांना अटक केली आहे.
उलवे सेक्टर ५ मध्ये राहणाऱ्या अलविना अदमली खान (वय २७) या विवाहितेची गत रविवारी मध्यरात्री भररस्त्यात गळा चिरून हत्या करण्यात आली होती. या हत्या प्रकरणाचा उलवे पोलिस आणि गुन्हे शाखेने तपास केला असता, मृत अलविना व तिचा पती किशोरसिंग राजपूत या दोघांमध्ये आर्थिक देवाण-घेवाणीतून तसेच घटस्फोट घेण्यावरून वाद झाल्याचे आढळून आले. त्यानुसार पोलिसांनी किशोरसिंग याला ताब्यात घेऊन त्याची चौकशी केल्यानंतर त्याने अलविनाची हत्या घडवून आणण्यासाठी उलवेत राहणाऱ्या अलिशा त्यागी हिला सहा लाखांची सुपारी दिल्याचे उघडकीस आले.
तसेच अलिशा त्यागी व डिंपल या दोघींनी पंजाब येथून सुखबीर राठिया व गुरुप्रीत सिंग या दोघांना अलविनाची हत्या करण्यास सांगितले होते. त्यानुसार सुखबीर व गुरुप्रीत या दोघांनी गत रविवारी दुचाकीवरून अलविनावर पाळत ठेवली होती. रात्री १२ वाजण्याच्या सुमारास अलविना आपल्या घरी पायी चालत जात असताना, सुखबीर याने अलविनाचा गळा चिरला होता. त्यानंतर दोघा मारेकऱ्यांनी दुचाकीवरून तेथून पलायन केले होते. त्यानंतर पोलिसांनी किशोरसिंग राजपूत, अलिशा त्यागी व डिंपल या तिघांना अटक केली होती, मात्र अलविनाची हत्या करणारे दोघे मारेकरी फरार झाले होते. त्यामुळे गुन्हे शाखा व उलवे पोलिसांकडून या मारेकऱ्यांचा शोध घेण्यात येत होता.
....................
या हत्या प्रकरणातील दोघे मारेकरी उत्तर प्रदेशमधील नेएडा येथे असल्याची माहिती उलवे पोलिसांना मिळाली होती. त्‍यानंतर उलवे पोलिस आणि गुन्हे शाखा युनिट-२ मधील पोलिस उपनिरीक्षक अभय शिंदे व संतोष पिलाणे यांचे संयुक्त पथक शनिवारी नोएडा येथे रवाना करण्यात आले होते. त्यानंतर या पथकाने स्थानिक पोलिसांच्या मदतीने सुखबीर राठिया व गुरुप्रीत सिंग या दोन्ही आरोपींना ताब्यात घेतले. त्यानंतर पोलिसांनी नोएडा गोतम नगर येथील न्यायालयाकडून ट्रान्झिट रिमांड मिळवून दोन्ही आरोपींना घेऊन ते नवी मुंबईच्या दिशेने रवाना झाल्याची माहिती गुन्हे शाखेचे सहाय्यक पोलिस आयुक्त अजयकुमार लांडगे यांनी दिली.