१५ वर्षीय मुलीचे अपहरण करीत लैंगिक अत्याचार
- दोन महिन्यांनी पीडित मुलीची पोलिसांकडून सुटका

सकाळ वृत्तसेवा
डोंबिवली, ता. २५ : एक १५ वर्षीय मुलीचे मसाला विक्रेत्याने अपहरण करीत तिच्यावर लैंगिक अत्याचार केल्याची घटना उघडकीस आली आहे. आरोपीने ही मुलगी गर्भवती राहिल्यानंतर तिचा गर्भपात करून तिला एका दाम्पत्याकडे ठेवले. त्यांनी तिच्याकडून वेश्याव्यवसाय करून घेतला. याप्रकरणी पोलिसांनी या दाम्पत्याच्या घरी छापा टाकत पीडितेची सुटका केली. याप्रकरणी एका महिलेसह तिचा पती, दोन पुरुष अशी चार जणांना अटक करण्यात आल्याची माहिती पोलिसांनी दिली.

टिळकनगर पोलिस ठाण्यात दाखल तक्रारीनुसार पीडित मुलगी आपल्या आई व बहिणींसह डोंबिवलीजवळील ग्रामीण परिसरात राहते. तिच्या आईचा खाद्यपदार्थ विक्रीचा व्यवसाय आहे. याच व्यवसायातून आशुतोष राजपूत या तरुणाचे त्यांच्या घरी येणे-जाणे होते. आशुतोष याचा मसाले विक्रीचा व्यवसाय आहे. यातून झालेल्या ओळखीचा फायदा घेत आशुतोषने पीडित मुलीशी ओळख वाढवली. या मुलीने दहावीची परीक्षा दिल्यानंतर तिचे आणि तिच्या आईचे भांडण झाले. त्यामुळे रागावलेल्या पीडितेने आशुतोषशी संपर्क साधला आणि त्याच्या घरी गेली. या संधीचा आशुतोषने फायदा घेत तिच्यावर लैंगिक अत्याचार केला. मुलगी घरी परतली नाही म्हणून आईने तिचा शोध घेतला. यादरम्यान आशुतोष तुमच्या मुलीला आज या ठिकाणी बघितले, त्या ठिकाणी बघितले असे सांगून मुलगी शहरातच आहे, असे तिच्या आईला सांगत होता. मुलगी रागावलेली असल्याने ती परत येईल, या आशेने पीडितेची आई आशुतोषवर विश्वास ठेवत होती; मात्र दोन महिन्यांपासून मुलगी घरीच न आल्याने तिला संशय आला. तिने याप्रकरणी टिळकनगर पोलिस ठाण्यात मुलीचे अपहरण झाल्याची तक्रार नोंदवली. पोलिसांनी गुन्हा दाखल करीत मुलीचा शोध सुरू केला. याचदरम्यान ही मुलगी डोंबिवलीजवळील ग्रामीण भागात एका घरात असल्याची माहिती मिळाली. पोलिसांनी त्या ठिकाणी छापा टाकत पीडित मुलीची सुटका केली. पीडित मुलीने केलेल्या खुलाशानंतर पोलिसांनी तपासाची चक्री फिरवली. मुस्कान शेख, तिचा नवरा यांच्यासह दोन जणांना अटक केली.

पोलिस चौकशीत आरोपी आशुतोषने मुलीचे अपहरण करीत तिला एका खोलीत डांबून तिच्यावर लैंगिक अत्याचार केला. यातून पीडित मुलगी गर्भवती राहिली असता तिचा एका दुसऱ्या महिलेच्या घरी नेऊन गर्भपात केला. त्यानंतर पुन्हा काही जणांनी तिच्यावर लैंगिक अत्याचार केला. नंतर त्या ठिकाणाहून या मुलीला मुस्कान नावाच्या एका महिलेच्या घरी डांबून ठेवण्यात आले. तिथे या पीडितेला वेश्याव्यवसायात ढकलत तिच्यावर लैंगिक अत्याचार सुरूच असल्याचे समोर आले. पोलिस या प्रकरणाचा अधिक तपास करीत असून, आशुतोष याचा शोध घेतला जात आहे.