बनावट पिस्तुलाचा धाक दाखवत लुटीचा प्रयत्न
घटना सीसीटीव्हीत कैद; दोघे ताब्यात

सकाळ वृत्तसेवा
डोंबिवली, ता. २५ : कारखान्यात शिरून बनावट पिस्तुलाचा धाक दाखवून खंडणी मागणीचा प्रकार उघडकीस आला आहे. या वेळी प्रसंगावधान राखत कारखाना मालका मोहम्मद शब्बीर शेख यांनी आरोपींना कारखान्यात ढकलून बंद केले. त्यानंतर तात्काळ या घटनेची माहिती फोन करून पोलिसांना दिली. त्यानंतर पोलिसांनी घटनास्थळी धाव घेत दोघाना ताब्यात घेतले. ही घटना कल्याण पूर्वेतील काटेमानिवली भागात शनिवारी (ता.२४) दुपारी घडली. हा प्रकार सीसीटीव्हीमध्ये कैद झाला असून, आरोपींकडील पिस्तूल बनावट असल्याचे उघड झाले आहे.

काटेमानिवली परिसरात मोहम्मद शब्बीर शेख (वय ४१) हे त्यांचा भाऊ व वहिनीसह प्रभात चाळ भागात हँडवर्कचा कारखाना चालवतात. या कारखान्यात शनिवारी दुपारी २ ते ३ वाजण्याच्या सुमारास त्यांच्या ओळखीचा सुभान पठाण हा तरुण येऊन पैशांची मागणी करीत होता. काही वेळातच त्याने पिस्तूल दाखवत धमकी देत पैशांची मागणी केली. त्यानंतर त्याचा साथीदार सिद्धार्थ अहिरे याच्यासह परत येऊन दोघांनी मिळून पुन्हा एक हजार रुपयांची मागणी केली. शेख यांनी प्रसंगावधान राखत सुभान पठाणला ढकलून देत कारखान्यात दोघांना बंद केले आणि त्वरित पोलिस कंट्रोल रूमला माहिती दिली. कोळसेवाडी पोलिसांनी तात्काळ घटनास्थळी पोहोचून दोघांना अटक केली. तपासादरम्यान आरोपीजवळील पिस्तूल नकली असल्याचे उघड झाले आहे. कोळसेवाडी पोलिसांनी सुभान पठाण व सिद्धार्थ अहिरे यांच्याविरोधात गुन्हा दाखल केला असून, अधिक तपास सुरू आहे.