भिवंडी, ता. २७ (वार्ताहर)ः वाहनचोरीत सराईत अक्षय वर्मा ऊर्फ शिवाला भिवंडी गुन्हे शाखेच्या पथकाने अटक केली आहे. त्याच्याकडून सहा दुचाकी तीन महागडे मोबाईल असा एकूण तीन लाख ४८ हजारांचा मुद्देमाल जप्त केला आहे.
नारपोली पोलिस ठाणे येथे दाखल वाहनचोरीच्या गुन्ह्याचा समांतर तपास भिवंडी गुन्हे शाखेकडून सुरू होती. या वेळी पोलिस हवालदार नीलेश बोरसे यांना मिळालेल्या गोपनीय माहितीच्या आधारे वरिष्ठ पोलिस निरीक्षक जनार्दन सोनवणे यांच्या मार्गदर्शनाखाली सहा. पोलिस निरीक्षक श्रीराज माळी, धनराज केदार, पोलिस उपनिरीक्षक रवींद्र पाटील, पोलिस कर्मचारी प्रशांत राणे, किशोर थोरात, सचिन जाधव, सुदेश घाग, शशिकांत यादव, अमोल इंगळे, उमेश ठाकूर, भावेश घरत, विजय कुंभार यांच्या पथकाने रेकॉर्डवरील आरोपी अक्षय वर्मा ऊर्फ शिवाला ताब्यात घेतले होते. त्याने नारपोली येथील वाहनचोरीची कबुली दिली. तसेच कापूरबावडी, कासारवडवली, शांतिनगर पोलिस ठाण्याच्या हद्दीतून चोरलेल्या सहा दुचाकी जप्त केल्या आहेत.