खारघर, ता. २६ (बातमीदार) : श्रीलंकामधील कोलंबो येथे पार पडलेल्या ६५ वर्षांवरील मास्टर अथेस्टिक स्पर्धेत सानपाडा येथील उत्तम माने यांनी सहभाग घेतला होता. त्यांनी लांब उडीत कांस्यपदक पटकावून नवी मुंबईचे नाव लौकिक केल्याने माने यांचे सर्व स्तरातून कौतुक होत आहे. ॲफिलेटेड टू वर्ल्ड मास्टर अथेलेटिक्स एशियन मास्टर श्रीलंका अथलेटिक्सच्या वतीने कोलंबो येथे २४ आणि २५ मे रोजी ६५ वर्षांवरील नागरिकांसाठी मास्टर अथेटिक्स स्पर्धेचे आयोजन करण्यात आले होते. या स्पर्धेत मलेशिया, इंडोनेशिया, श्रीलंका, मालदीव, म्यानमार, थायलंड आणि भारत आदी देशांतील स्पर्धक सहभागी झाले होते. या स्पर्धेत सानपाडा येथील उत्तम माने यांनी लांब उडी स्पर्धेत कांस्यपदक पटकावले. उत्तम माने हे मुळचे सातारा जिल्ह्यातील कराड तालुक्यातील गोंदी या गावचे रहिवासी असून गेल्या अनेक वर्षांपासून सानपाडा येथे वास्तव्याला आहेत. त्यांनी विविध ॲथेस्टिक स्पर्धेत ४६ सुवर्ण, ५२ रोप्य; तर ३० कांस्य अशी एकूण १२८ पदक प्राप्त केली आहे.