मुरबाड, ता. २७ (बातमीदार)ः तालुक्यात वाहनांच्या तुलनेत होणारा सीएनजीचा पुरवठा अपुरा आहे. अशातच शहरात एकच पंप असल्याने पहाटेपासून रांगा लावण्याची वेळ आल्याने चालक-मालकांना झोपमोड करावी लागत आहे.
मुरबाड शहरात सोनार पाडा व माळशेज घाट रस्त्यावरील सारिका हॉटेलजवळील पेट्रोलपंप येथे सीएनजी गॅस उपलब्ध होता. त्यापैकी सारिका हॉटेलजवळील पेट्रोलपंप बंद झाल्याने आता केवळ सोनार पाडा येथील पेट्रोलपंपावर गॅस उपलब्ध होतो. तेथे दररोज एक टँकर भरून गॅस आणला जातो. सकाळी ७ वाजता वाहनामध्ये गॅस भरण्याचे काम सुरू होते, पण दुपारी गॅस संपत असल्याने अनेकांना २५ किलोमीटरचे अंतरावरील बदलापूर, कांबा, कोलम किंवा गोवेली येथे जावे लागते, पण यासाठी लागणारा वेळ आणि होणाऱ्या खर्चामुळे वाहनचालकांना भुर्दंड पडत आहे. त्यामुळे मुरबाड शहरात ऑनलाइन सीएनजी गॅसपुरवठा करणारा पंप सुरू करण्यात यावा तसेच ग्रामीण भागात नवीन गॅस पंप सुरू करावा, अशी मागणी होत आहे.
----------------------------------------
मुरबाड शहरात गॅसवर चालणाऱ्या रिक्षा, कारची संख्या अधिक आहे. रिक्षावाल्यांना दररोज गॅस भरावा लागतो. त्यासाठी पहाटे लवकर उठून रांगेत थांबावे लागते अन्यथा गॅस मिळत नाही. त्यामुळे आणखी एखादा पेट्रोलपंप तालुक्यात सुरू करण्याची गरज आहे.
- सतीश पोद्दार, वाहनमालक, मुरबाड