शहापूर, ता. २७ (वार्ताहर) : तालुक्यातील भाजीपाला तसेच दुबार उन्हाळी भातपिके घेणाऱ्या शेतकऱ्यांचे अवकाळी पावसाने मोठ्या प्रमाणात नुकसान झाले आहे. या नुकसानग्रस्त शेतकऱ्यांना भरपाई देण्याची मागणी शहापूर भाजपने केली आहे.
मे महिन्याच्या सुरुवातीला भातसा धरणाच्या उजव्या कालव्यावर तालुक्यातील आवरे, कांबारे, चेरपोली, तुते, अर्जुनली, पिंपळपाडा, काळेपाडा, कवडास सरलांबे, साजिवली, सावरशेत, खुटारी, खरीवली गावांमधील शेतजमीन ओलिताखाली आहे. येथील शेतकरी उन्हाळी भात तसेच भाजीपाल्याचे पीक घेतात. पण अचानक आलेल्या अवकाळी पावसाने त्याचे नुकसान झाले आहे. दुसरीकडे शेतकऱ्यांनी विनंती करूनही भातसा धरण विभागाने १ मेदरम्यान कालव्याचे पाणी बंद केले नसल्याचा फटका पिकांना बसला आहे. शेतातील भाताचे उभे पीक भिजत पडले आहे. तसेच पालेभाज्या सडल्याने या नुकसानीचे त्वरित पंचनामे करून शेतकऱ्यांना नुकसानभरपाई देण्यात यावी, अशी मागणी मंगळवारी (ता. २७) भाजपच्या आदिवासी आघाडीचे प्रदेश उपाध्यक्ष अशोक इरनक यांच्या नेतृत्वाखाली शेतकरी, पदाधिकाऱ्यांनी तहसीलदार परमेश्वर कासुळे यांची भेट घेऊन केली आहे.