विजेच्या खोळंब्याने नागरिक त्रस्त
पोयनाड, ता. २७ (बातमीदार) : मागील काही दिवसांपासून सुरू असलेल्या मुसळधार पावसामुळे जनजीवन विस्‍कळित झाले आहे. याचा सर्वात जास्त त्रास हा वीजग्राहकांना सोसावा लागत आहे. पोयनाड परिसरात पोयनाड, पेझारीसह लहानमोठी गावे आणि आदिवासी वाड्या-पाड्यात विजेचा लपंडाव सुरू असल्याने अनेकांची गैरसोय होत आहे.
या परिसरात विजेचा दैनंदिन वापर करणारे वापरकर्ते मोठ्या संख्येने आहेत, मात्र मागील दोन ते तीन दिवसांपासून होणाऱ्या मुसळधार पावसामुळे परिसरातील वीजपुरवठा सातत्याने खंडित होत आहे. पाऊस पडून गेल्याने हवेत गारवा निर्माण झाला असला तरी खंडित होणाऱ्या वीजपुरवठ्यामुळे सर्वसामान्य नागरिक हैराण झाले आहेत. शासकीय कार्यालय, रुग्णालय, बाजारपेठ, बँका, सायबर कॅफे, गिरणी, व्यापारी संकुल, व्यायामशाळा यांना सातत्याने खंडित होणाऱ्या वीजपुरवठ्याचा त्रास होत आहे, तर सातत्याने खंडित होणाऱ्या वीजपुरवठ्यामुळे परिसरातील इंटरनेट सेवादेखील ठप्प झाली आहे.
पावसाळापूर्व विजेची कामे लवकरात लवकर करून हा सातत्याने खंडित होणार वीजपुरवठा थांबवावा, अशी मागणी महावितरणकडे नागरिक करत आहेत.