बदलापूर, ता. २७ (बातमीदार) : शहरापासून सात ते आठ किमी अंतरावर असलेल्या बेंडशीळ येथील रस्ता हा अतिशय दयनीय झाला आहे. या रस्त्यावर मोठमोठे खड्डे पडलेले आहेत. या रस्त्यावरून खड्ड्यांचा अंदाज न आल्यास अपघात होण्याची दाट शक्यता निर्माण झाली आहे. रस्त्यासाठी प्रस्ताव पाठवूनही मंजुरी मिळत नसल्याचे ग्रामपंचायतीकडून सांगण्यात येत आहे.
चामटोली ग्रुप ग्रामपंचायत हद्दीतील बेंडशीळ या गावातील रस्त्याची पुरती दुरवस्था झाली आहे. या रस्त्यावर मोठमोठे खड्डे पडलेले असून गाडी चालवताना वाहनचालकांना तारेवरची कसरत करावी लागत आहे. रस्ता अरुंद असल्याने खड्डा चुकवता येत नाही. पावसाळापूर्वी हा रस्ता दुरुस्त न झाल्यामुळे या ठिकाणी अपघात होण्याची दाट शक्यता आहे. असे असताना ग्रामीण भागातील रस्ते दुरुस्तीसाठी का प्रयत्न होत नाहीत, असा प्रश्न येथील ग्रामस्थ उपस्थित करत आहेत. आजूबाजूच्या ग्रामीण भागातील रहिवाशांना चांगला रस्ताच नसल्याने मोठा त्रास सहन करावा लागत आहे.

रस्त्यासंदर्भात वेळोवेळी पंचायत समिती कार्यालय अंबरनाथ यांना पत्र दिले आहे. रस्त्याच्या कामाला अद्याप मंजुरी मिळाली नसल्याने, दुरुस्ती करता आली नाही. ग्रामीण भागातील घरपट्टीतून तुटपुंजी रक्कम मिळते. त्यात रस्ता दुरुस्तीसाठी साधारण दहा ते पंधरा लाख रुपये खर्च येईल आणि तेवढा मोठा खर्च ग्रामपंचायत आपल्या स्तरावर करू शकत नाही.
- भालचंद्र कांबरी, सदस्य, चामटोली ग्रुप ग्रामपंचायत