पंपहाउसचे काम
तातडीने पूर्ण करा!
आमदार मंदा म्हात्रे यांच्या सूचना
सकाळ वृत्तसेवा
नवी मुंबई, ता. २७ ः नवी मुंबईत सोमवारी झालेल्या मुसळधार पावसामुळे पहिल्यांदाच सीबीडी-बेलापूर सेक्टर ११ हा भाग पाण्यात गेला. ही परिस्थिती पुन्हा उद्भवू नये, याकरिता बेलापूरच्या पंपहाउसचे काम वेळेवर पूर्ण करा, अशा सूचना भाजपच्या आमदार मंदा म्हात्रे यांंनी महापालिका आयुक्त डॉ. कैलास शिंदे यांना केल्या.
नवी मुंबईत अतिवृष्टी होऊन जनजीवन विस्कळित झाले होते. त्या पार्श्वभूमीवर मंदा म्हात्रे यांच्या नेतृत्वाखाली भाजपच्या शिष्टमंडळाने आज शिंदे यांची भेट घेतली. नवी मुंबईमध्ये सलग तीन दिवस सुरू असलेल्या संततधार पावसाने नागरिकांची दाणादाण उडवली. यंदा मॉन्सून लवकर येण्याचा अंदाज असतानाही महापालिकेने दुर्लक्ष करू नये. पावसाळ्यात सर्व विभागांनी समन्वयाने काम करावे आणि नागरिकांना दिलासा देण्यासाठी नियोजन करण्याचे निर्देश म्हात्रे यांनी महापालिकेला दिले. याप्रसंगी नवी मुंबई भाजपा जिल्हाध्यक्ष डॉ. राजेश पाटील, माजी नगरसेवक राजू शिंदे, बेलापूर मंडळ अध्यक्ष अजय सिंग, सीवूड्स मंडळ अध्यक्ष सुधीर जाधव आदी कार्यकर्ते उपस्थित होते.