वृद्ध महिलेकडून एक किलो गांजा जप्त
रोहा पोलिसांची धडक कारवाई
रोहा, ता. ३० (बातमीदार) ः रेल्वेस्थानकाशेजारी असलेल्या झोपडपट्टीतून रोहा पोलिसांनी एका ७५ वर्षीय महिलेकडून एक किलो गांजा पोलिसांनी जप्त केला आहे. याप्रकरणी महिलेविरोधात गुन्हा दाखल केला आहे. या घटनेमुळे सर्वत्र खळबळ उडाली. तर कारवाईमुळे गांजाविक्री करणाऱ्यांचे धाबे दणाणले आहेत.
रोहा रेल्वेस्थानक पटरीच्या बाजूस झोपडीमध्ये एका ७५ वर्षीय महिलेने विक्रीसाठी गांजा आणला आहे, अशी गोपनीय माहिती पोलिसांना समजताच गुरुवारी (ता. २९) रोजी रात्री ८.२० वाजण्याच्या सुमारास सापळा रचला व पोलिसांनी त्या महिलेकडील ३४ हजार ६४० रुपये किमतीचा एक किलो ७३२ ग्रॅम वजनाचा बेकायदा गांजा जप्त केला आहे. या महिलेविरोधात पोलिसांनी कायदेशीर कारवाई केली असून पोलिस निरीक्षक मारुती पाटील यांच्या मार्गदर्शनाखाली पोलिस उपनिरीक्षक पायक पुढील तपास करीत आहेत.
रोहे शहरातील तरुण पिढी गांजा, एमडी आदी अमली पदार्थ्यांच्या आहारी गेली आहे. शिक्षणाचे वय असताना ही मंडळी नदीकाठी, जंगल भागातील निर्मनुष्य ठिकाणी जाऊन आपली हौस पूर्ण करताना दिसतात. तर सध्या शहरातील अनेक ठिकाणी अमली पदार्थांची खुलेआम विक्री होत आहे. विशेष म्हणजे, यात तरुण आणि ज्येष्ठ मंडळी आहेत. दुसरीकडे चिंताजनक बाब म्हणजे यामध्ये काही महिलादेखील असल्याने आश्चर्य व्यक्त होत आहे. पोलिसांच्या कारवाईनंतरही ही मंडळी पुन्हा आपला व्यवसाय सुरू करतात. त्यामुळे पोलिसांनी अमली पदार्थ विक्री करणाऱ्यांचा कायमस्वरूपी बंदोबस्त करावा, अशी मागणी जनतेतून होत आहे.