चेन्नई एक्स्प्रेसमधून जाणाऱ्या ‘त्या’ २९ बालकांची माहिती समोर
कैलास म्हामले ः सकाळ वृत्तसेवा
कर्जत, ता. ३० ः कर्जतच्या रेल्वेस्थानकात २० एप्रिल रोजी एक घटना समोर आली. यात चेन्नई एक्स्प्रेसमधून तब्बल २९ बालकांसह प्रवास करणाऱ्या व्यक्तीला हालचाली संशयास्पद वाटल्यामुळे काही व्यक्तींचा संशय आला आणि त्याची तक्रार जीआरपीला करण्यात आली. यानंतर रेल्वे पोलिसांनी या सर्व मुलांना व त्या व्यक्तीला कर्जत रेल्वेस्थानकात उतरवले. संबंधित व्यक्तीकडे पुरेशी कागदपत्रे न आढळल्याने या मुलांची तस्करी केली जात असल्याचे आरोप झाले व थेट या सर्व मुलांना बाल सुधारगृहात पाठवण्यात आले, मात्र आता या प्रकरणाचा संपूर्ण उलगडा झाला आहे.
चेन्नई एक्स्प्रेसमधील सर्व २९ लहान मुले मोहम्मद जलालुद्दीन मोहम्मद फिदा हुसेन सिद्दिकी यांच्यासोबत कर्नाटकातील रायचूर येथील मदरशांमध्ये कुराण आणि उर्दू शिक्षणासाठी जात होते. जिल्हाधिकारी, रेल्वे पोलिस आणि अन्य संबंधित यंत्रणांनी तपास केल्यानंतर हे विद्यार्थी त्यांच्या पालकांच्या संमतीने धार्मिक शिक्षणासाठी जात असल्याचे स्पष्ट झाले. परिणामी, या सर्व बालकांची बाल सुधारगृहातून सुटका केली असून, त्यांच्या पालकांच्या ताब्यात सोपवले आहे. ही घटना समोर आल्यानंतर कर्जत मस्जिद ट्रस्टचे अध्यक्ष सैदू शेख व त्यांच्या सहकाऱ्यांनी पुढाकार घेत त्वरित मुलांच्या पालकांशी संपर्क करीत या सर्व प्रकरणाची शहानिशा केली आणि सर्व बालकांना पालकांच्या स्वाधीन केले.
तसेच, या सर्व प्रक्रियेमध्ये अब्बास मौला, शानू मुल्ला, जहूर शेख, एजाझ, वाजीद शेख, नदीम व सोहेल कुरेशी, सलीम जलगावकर, खलिल जलगावकर, रमजान शेख, अब्दुल रेहमान मुल्ला उर्फ सोहेल, हैदर शेख, जमीर शेख, बिलाल अढाल, नवाझ तांबोळी, शादाब शेख, इम्रान मुल्ला, निसार शेख, हमीद अन्सारी, अमीर मनियार यांनी देखील मोलाची भूमिका बजावली आहे.