अनधिकृत बांधकामावर महापालिकेचा हातोडा?
टिटवाळा, ता. ३१ (वार्ताहर) : कल्याण-डोंबिवली महापालिका क्षेत्रातील टिटवाळालगत असलेल्या परिसरातील विनायक आशीष अपार्टमेंटमध्ये पार्किंगच्या जागेत उभारलेल्या अनधिकृत गाळ्यांवर कारवाई करण्याचे आदेश महापालिकेने दिले आहेत. रहिवाशांनी केलेल्या लेखी तक्रारीनंतर कारवाई करण्यात येत आहे. मांडा येथे उभारलेल्या या इमारतीत मंजूर आराखड्याचे उल्लंघन करीत विकसकाने १० अनधिकृत गाळे बांधले होते. रहिवाशांच्या म्हणण्यानुसार, ही दुकाने पार्किंगच्या जागेत बेकायदा बांधून भाड्याने दिली होती. तसेच सोसायटीसाठी असलेले स्वच्छतागृहही तोडून रूममध्ये रूपांतरित केले होते. रहिवाशांनी आयुक्तांना दिलेल्या निवेदनात विकसकावर कायदेशीर कारवाईची मागणी केली होती.

महापालिकेने महाराष्ट्र प्रादेशिक व नगररचना अधिनियम १९६६ अंतर्गत सुनावणी आयोजित केली होती. सुनावणीला सहाय्यक आयुक्त प्रमोद पाटील हे पदनिर्देशित अधिकारी म्हणून उपस्थित होते. सुनावणीत बांधकामधारक महेश गोयल हे कोणतेही अधिकृत दस्तऐवज सादर करू शकले नाहीत. परिणामी, हे बांधकाम अनधिकृत ठरवण्यात आले असून पाच गाळे आणि दोन सदनिका १५ दिवसांच्या आत स्वतःहून हटविण्याचे आदेश दिले आहेत. अन्यथा, पोलिस बंदोबस्तात महापालिका स्वतः कारवाई करणार आहे. खर्च बांधकामधारकाकडून वसूल करण्यात येणार आहे. याशिवाय प्रकरणात फौजदारी कारवाईही प्रस्तावित केली आहे.