उपप्रमुख अभियंता संजय सोनवणे सेवानिवृत्त
घाटकोपरमधील सत्‍कार सोहळ्याला अधिकारी, कर्मचाऱ्यांची उपस्‍थिती
घाटकोपर, ता. ३० (बातमीदार) ः महापालिकेच्या सेवेत दुय्यम अभियंता म्हणून दाखल होऊन सहाय्यक पालिका आयुक्त ते उपनगर उपप्रमुख अभियंता म्हणून तब्बल ३० वर्षे ३ महिने सेवा बजावणारे अधिकारी संजय सोनवणे हे पालिकेच्या सेवेतून निवृत्त झाले. या पार्श्वभूमीवर शुक्रवारी (ता. ३०) घाटकोपर येथे त्यांचा सेवानिवृत्ती सोहळा पार पडला. या वेळी लोकप्रतिनिधी, पालिकेचे अधिकारी, कर्मचाऱ्यांची उपस्‍थिती होती.
घाटकोपर पूर्वेकडील ९० फुटी रोडवरील लवेंडर बाग हॉलमध्ये हा सत्कार सोहळा पार पडला. या वेळी आमदार दिलीप लांडे, आमदार तुकाराम काते यांच्यासह ईशान्य मुंबई शिवसेना ठाकरे गटाचे विभागप्रमुख आणि माजी नगरसेवक सुरेश पाटील, राष्टवादी काँग्रेस (शरद पवार)च्या मुंबई अध्यक्षा राखी जाधव, माजी नगरसेवक बाबा हांडे, राष्ट्रवादीचे अमोल मातेले यांच्यासह पालिकेचे वरिष्ठ अधिकारी, कर्मचारी, घाटकोपर एन विभागाचे सहाय्यक पालिका आयुक्त गजानन बेल्लाळे आदी मान्यवर उपस्थित होते.
मान्यवरांनी संजय सोनवणे यांच्या पालिकेच्या सेवेतील अनेक आठवणी सांगितल्या. सोनवणे हे १ मार्च १९९५ रोजी पालिकेच्या सेवेत रुजू झाले. त्यानंतर ते ३१ मे रोजी निवृत्त होणार असल्यामुळे नागरिकांनीही या ठिकाणी प्रचंड गर्दी केली होती. या सेवेच्या काळात सोनवणे यांनी सामाजिक जाणीव ठेवत आणि वेळेचा कटाक्ष पाळत कामाची कुशलता दाखवून दिली. या वेळी संजय सोनवणे यांनी सांगितले, की १ मार्च १९९५ रोजी मुंबई महापालिकेत घाटकोपर येथील उपनगर उप अभियंता (रस्ते) कार्यालयातील दुय्यम अभियंता म्हणून सेवेत रुजू झालाे. आता माझी निवृत्तीही याच कार्यालयातून उपनगर उपप्रमुख अभियंता (रस्ते) पदावरून होत आहे. हा योगायोग असला तरी मध्यंतरीच्या काळात आपण अनेक ठिकाणी वेळेचे महत्त्व लक्षात घेऊन अधिकारी, कर्मचारी आणि इतकेच नाही तर जनतेचीही मर्जी राखून काम केले.