दुचाकी खरेदीसाठी मंदिरात करायचा घरफोडी
आरोपीला अटक; पंतनगर पोलिसांची कारवाई
घाटकोपर, ता. ३१ (बातमीदार) ः पंतनगर पोलिस ठाणे हद्दीतील मंदिरामध्ये घरफोडी करून दुचाकी खरेदी करण्यासाठी दानपेटीतील पैसे चोरी करणाऱ्या एका आरोपीला पोलिसांनी जेरबंद करून चोरी केलेला संपूर्ण मुद्देमाल हस्तगत केला आहे. दीपक भुक्तर असे त्याचे नाव आहे.
घाटकोपर पूर्वेकडील पंतनगर मुख्य सहकार मार्केटमध्ये भवानी माता मंदिरामधील तीन दानपेट्या फोडून अंदाजे २५ ते ५० हजार रुपयांची चोरी झाल्याची माहिती मंदिर समिती सदस्‍यांनी पोलिसांना दिली. घटनेचे गांभीर्य ओळखून तत्काळ गुन्हा दाखल करण्यात आला. पंतनगर पोलिस ठाणे येथे कलम ३०५, ३३१ (४), ३३४ (१) गुन्हा दाखल होताच तीन स्वतंत्र पथके तयार करून तपास सुरू करण्यात आला. आरोपी हा स्वतःची ओळख लपवण्यासाठी तोंडावर मास्क लावून मंदिरामध्ये घरफोडीसाठी प्रवेश करायचा. त्‍यामुळे आरोपीला शोधण्याचे मोठे आव्हान होते. तांत्रिक मदतीने अभिलेखावरील अशा प्रकारे चोरी करणाऱ्या आरोपींचा शोध असताना आरोपी सापडला. आरोपीच्या घराच्या झडतीमध्ये मंदिरातील दानपेटीतून चोरलेली सर्व रोख व नाण्याची १४ हजार ८०० रुपये रक्कम, आरोपीने परिधान केलेले कपडे व गुन्ह्यातील हत्यार आरोपीच्या घरातून हस्तगत करण्यात आले आहे.