रस्त्यावर कचऱ्याचे ढिगारे
कांदिवलीतील वाहनचालक, प्रवाशांच्या आरोग्याला धोका
कांदिवली, ता. ३१ (बातमीदार) ः कांदिवली पश्चिमेच्या जुना लिंक रोडला छेदणाऱ्या पोस्टाच्या गल्लीच्या कोपऱ्यावर इंडियन ऑईल पेट्रोलपंपाला लागून असलेल्या मार्गांवर कचऱ्याचे साम्राज्य पसरले आहे. किमान दोन-तीन गाड्या भरतील एवढे कचऱ्याचे ढिगारे साचल्याने कीटकांचा प्रादुर्भाव वाढून दुर्गंधी पसरली आहे. याचा त्रास कर्मचारी वाहनचालक, प्रवाशांना सहन करावा लागत आहे.
गेल्या आठवड्यापासून येथील कचऱ्यामध्ये वाढ होत आहे. त्‍यामुळे पालिकेने तातडीने कचरा उचलून साफसफाई करावी, अशी मागणी पोस्‍ट कर्मचारी, अदाणी इलेक्‍ट्रिसिटीच्या कर्मचाऱ्यांनी केली आहे. जुन्या लिंक रोडला इंडियन ऑईल पेट्रोलपंपाजवळ छेदणाऱ्या मार्गावर मुख्य पोस्‍ट कार्यालय, इंडस्ट्रियल कंपन्या, अदाणी इलेक्ट्रिसिटी कार्यालय आहे. त्‍यामुळे या मार्गावर नागरिकांसह कर्मचाऱ्यांची मोठ्या प्रमाणात ये-जा सुरू असते. पेट्रोलपंपावर, सीएनजी भरण्यासाठी अरुंद मार्गावर लांबलचक रांगा लागतात. मुख्य मार्ग अरुंद असून, त्यावर मोठ्या प्रमाणात कचरा साचल्याने वाहनांच्या रांगा अर्ध्या रस्त्यावर लागतात. अनेकदा वाहतूक कोंडीदेखील होते. येथे पालिकेची कचरा संकलन करणारी हायवा यंत्रणा आहे. बाजूलाच सार्वजनिक शौचालय आहे. शौचालयाच्या पुढील बाजूसदेखील जवळपास ३० फुटांपर्यंत मोठ्या प्रमाणात कचऱ्याचे ढिगारे साचल्याने पोस्टाच्या मार्गाची कचरा गल्ली झाली आहे. पावसाळ्यात प्रचंड दुर्गंधी निर्माण होऊन घाण पाणी रस्त्यावर येते. कीटकांचा प्रचंड प्रादुर्भाव वाढला आहे. या ढिगाऱ्याच्या बाजूने रिक्षांच्या रांगा लागतात. कर्मचाऱ्यांना, प्रवाशांना घाणीतूनच नाक दाबून मार्गक्रमण करावे लागत आहे. सीएनजी व पेट्रोल भरण्यासाठी रिक्षाचालकांना १५ ते २० मिनिटे घाणीच्या बाजूलाच रांगेत उभे राहावे लागत असल्‍याने त्‍यांना दुर्गंधीचा त्रास सहन करावा लागतो. या ढिगाऱ्यांमुळे, वाहनचालकांसह प्रवासी, कर्मचारी आणि कामानिमित्त येणाऱ्या नागरिकांचे आरोग्य धोक्यात आले आहे.

साफसफाई केली जाते. वाहने उपलब्ध नव्हती. औद्योगिक वसाहतीमधील कचरा रात्री-अपरात्री मोठ्या प्रमाणात टाकला जातो. देखरेख करण्यास मार्शल नाहीत. दोन दिवसांत कचरा उचलण्यात येईल.
- राजेंद्र राणे,
पर्यवेक्षक, घनकचरा व्यवस्थापक