अंबरनाथमध्ये भाजीविक्रेत्यावर हल्ला
अंबरनाथ, ता. ३१ (वार्ताहर) : भाजीविक्रेत्यावर तोंडाला रुमाल बांधून टोळक्याने धारदार शस्त्राने हल्ला केल्याची घटना अंबरनाथमध्ये घडली आहे. ही घटना सीसीटीव्हीत कैद झाली असून याप्रकरणी अंबरनाथ पश्चिम पोलिस ठाण्यात अज्ञात हल्लेखोरांविरोधात गुन्हा दाखल केला आहे. अंबरनाथ पूर्वेच्या दत्तकुटीर परिसरातील भाजीविक्रेते बाबू कन्नड हे शुक्रवारी (ता. ३०) रात्री नऊ वाजता अंबरनाथ पश्चिमेच्या बांगडी गल्ली परिसरातून जात होते. या वेळी त्यांचा पाठलाग करीत तोंडाला रुमाल बांधून आलेल्या तीन ते चार हल्लेखोरांनी त्यांच्यावर धारदार शास्त्राने हल्ला केला. ही संपूर्ण घटना सीसीटीव्हीत कैद झाली. या हल्ल्यात बाबू कन्नड यांच्या पाठीवर, खांद्यावर आणि हातावर धारदार शस्त्राने दुखापत केली. याप्रकरणी अंबरनाथ पश्चिम पोलिस ठाण्यात गुन्हा दाखल केला असून पोलिस सध्या हल्लेखोरांचा शोध घेत आहेत.