भाषा हे संवादाचे माध्यम : आशीष शेलार

घाटकोपर, ता. ३१ (बातमीदार) : ‘भाषा हे संवादाचे माध्यम आहे; संघर्षाचे नाही. भाषा लोकांना एकत्र करण्याचे काम करीत आली आहे. भाषेचा वापर लोकांमध्ये फूट पाडण्यासाठी करू नये. भाषेच्या नावाखाली द्वेष पसरवणाऱ्यांनी छत्रपती शिवाजी महाराज आणि त्यांचे पुत्र छत्रपती संभाजी महाराज यांच्याकडून प्रेरणा घ्यावी,’ असे प्रतिपादन शुक्रवारी (ता. ३०) सांस्कृतिक मंत्री आशीष शेलार यांनी केले. वांद्रे पूर्व सभागृहात हिंदी पत्रकारिता दिनानिमित्त हिंदी सेवा सन्मान समारंभात ते बोलत होते. ‘हिंदी ही मुंबईची सामान्य भाषा बनली आहे. असे असूनही काही लोक आपले अस्तित्व टिकवण्यासाठी भाषेच्या नावाखाली द्वेष पसरवतात. मुंबईत ज्याला हिंदी येते तो मराठीही जाणतो आणि ज्याला मराठी येते तो हिंदीही जाणतो. हिंदी आणि मराठीतील समन्वयाचा परिणाम म्हणून महायुती सरकार चालवले जात आहे.’ या वेळी माजी मंत्री चंद्रकांत त्रिपाठी, आमदार राजहंस सिंह, संजय उपाध्याय, सिद्धिविनायक मंदिर ट्रस्टचे कोषाध्यक्ष आचार्य पवन त्रिपाठी उपस्थित होते.