टोळक्याकडून एकास बेदम मारहाण
नशाखोरांच्या उच्छादाने इमारतीतील नागरिक बेजार
कल्याण, ता. १ : विजयनगर आमराई परिसरातील यशवंत हाइट्स इमारत परिसरातील रस्त्यावर शुक्रवारी (ता. ३०) मध्यरात्रीच्या सुमारास एकास टोळक्याकडून जबर मारहाण करण्यात आली. इमारतीत लावण्यात आलेल्या सीसीटीव्हीत ही मारहाण कैद झाली आहे. या मारहाणीचे नेमके कारण समजू शकले नसून कोळसेवाडी पोलिस अधिक तपास करीत आहेत, मात्र या घटनेनंतर परिसरातील नागरिकांमध्ये भीतीचे वातावरण कायम आहे.
कल्याण पूर्व भागात गुन्हेगारी मोठ्या प्रमाणावर वाढू लागली आहे. त्यातच टोळक्यांकडून मारहाण होण्याच्या घटना या अगोदरही घडल्या आहेत. यशवंत इमारतीतील रहिवासी नशेबाजांच्या उच्छादामुळे अगोदरच बेजार झाले आहेत. अंतर्गत रस्त्यावर पालिकेने पथदिव्यांची सोय केली नसल्याने मोकळ्या जागेत नशेबाज तरुणांचा उच्छाद असतो. या ठिकाणी लुटपाट झाल्याचेही येथील रहिवाशांचे म्हणणे आहे. त्यामुळे पालिकेने पथदिव्यांची सोय करावी व पोलिसांनी नशाबाजांचा कायमचा बंदोबस्त करावा, अशी मागणी येथील नागरिक करीत आहेत.

यशवंत हाइट्स इमारत परिसरात गर्दुल्ले, नशेडी यांनी उच्छाद मांडला आहे. दररोज रात्री-अपरात्री त्यांचा धिंगाणा चालतो. त्यामुळे येथील लहान मुले व महिलावर्ग असुरक्षिततेच्या वातावरणात आहेत. पोलिसांनी या ठिकाणी रात्रीची गस्त वाढवावी, अशी मागणी आम्ही अनेकदा केली आहे. दोन दिवसांपूर्वीच यासंदर्भात सोसायटीने आवाज उठवला होता आणि त्यातच काल अशी घटना घडल्याने येथील रहिवाशांमध्ये भीतीचे वातावरण आहे, अशी प्रतिक्रिया यशवंत हाइट्सचे रहिवासी सुमेध हुमणे यांनी दिली आहे.