खारघर, ता. १ (बातमीदार) : वाशी सेक्टर १५ येथील जुहूनगर सहकारी गृहनिर्माण संस्थेच्या इमारत दुरुस्तीच्या कामात आर्थिक गैरव्यवहार झाल्याचे चौकशीत आढळले आहे. याबाबत संस्थेचे पदाधिकारी व समिती सदस्यांवर जबाबदारी निश्चित करण्याचे आदेश सिडकोचे उपनिबंधक प्रताप पाटील यांनी दिले आहेत.
वाशी सेक्टर १५ येथील जुहूनगर सहकारी गृहनिर्माण संस्थेचे सभासद गणेश पेडामकर व भाग्येश चव्हाण यांनी संस्थेच्या इमारत दुरुस्तीच्या कामामध्ये आर्थिक गैरव्यवहार झाल्याची तक्रार सिडकोच्या उपनिबंधक सहकारी संस्थेकडे केली होती. याची दखल घेत उपनिबंधक प्रताप पाटील यांनी आर्थिक गैरव्यवहाराची चौकशी करण्यासाठी सहाय्यक निबंधक बी. के. परब यांची नियुक्ती करून अहवाल सादर करण्याचे आदेश दिले होते. चौकशीत तत्कालीन पदाधिकारी व समिती सदस्यांच्या मनमानी कारभारामुळे संस्थेचे आर्थिक नुकसान झाल्याचे आढळले. इमारत दुरुस्तीच्या कामामध्ये ३३ लाखांहून अधिक रकमेचा गैरव्यवहार झाल्‍याचे समोर आले आहे. संस्थेचे पदाधिकारी व समिती सदस्यांवर जबाबदारी निश्चित करण्याचे आदेश सिडकोचे उपनिबंधकांनी दिल्‍याने सोसायटीच्या पदाधिकाऱ्यांचे धाबे दणाणले आहेत.