भिवंडी, ता. १ (बातमीदार) : तालुक्यातील जन्म-मृत्यूच्या प्रकरणांचा मुदतीत निपटारा करण्यासाठी भिवंडीचे अधीनस्त नायब तहसीलदारांना प्राधिकृत करण्यात आले होते. दरम्यान, तारखेपासून एक वर्षानंतर प्राप्त होणारी प्रकरणे अधिक असल्याने १३३ जन्म-मृत्यूचे दाखले रद्द करण्यात आले आहेत.
भिवंडी महापालिका क्षेत्र आणि ग्रामीण ग्रामपंचायती क्षेत्रातील ११ आॅगस्ट २०२३ ते २१ जानेवारी २०२५ या कालावधीत नायब तहसीलदारांकडून जन्म-मृत्यूचे १३३ दाखले देण्यात आले. या दाखल्यांचा शैक्षणिक, जमिनीचे व्यवहार तसेच इतर सरकारी कामांबरोबर वैयक्तिक कामासाठी उपयोग केला जाणार होता. पण तहसीलदार अभिजित खोले यांनी हे दाखले रद्द केले असून, सक्षम अधिकाऱ्याकडून फेरतपासणी/पडताळणी करून तातडीने निर्णय घेऊन पुढील कारवाईचे निर्देश दिलेले आहेत. या नोंदी बदलण्यासाठी नवीन दाखले मिळवावे लागणार आहेत. तसेच नोंदणी करणाऱ्या स्थानिक स्वराज्य संस्था म्हणजे महापालिका आणि ग्रामपंचायतींना तहसील कार्यालयातून लेखी पत्र पाठवून दाखले रद्द केल्याची माहिती दिली आहे.
-------------------------------------------
आदेशातील तरतुदीचा विसर
भारत सरकारच्या विधी व न्याय विभागाकडील ११ आॅगस्ट २०२३ रोजीच्या राजपत्रात जन्म-मुत्यू नोंदणी (सुधारणा) कायद्यानुसार ठाणे जिल्हा दंडाधिकारी यांनी भिवंडी तालुक्यातील जन्म मृत्यूच्या तारखेपासून १ वर्षानंतरच्या विलंबाने प्राप्त झालेल्या प्रकरणांमध्ये जन्म-मृत्यूची नोंद करण्याबाबत अनुषंगिक कार्यवाही करून आदेश देण्यासाठी भिवंडी तालुक्याचे कार्यकारी दंडाधिकाऱ्यांना अधिकार प्रदान केले होते.
--------------------------------------------
नव्याने कागदपत्रांची जुळवाजुळव
तहसील कार्यालयातील नायब तहसीलदारांनी दिलेले दाखले अचानकपणे रद्द केल्याने महापालिका हद्दीत तसेच ग्रामीणमधील ग्रामपंचायत हद्दीत राहणारे दाखलेधारक हैराण झाले आहेत. या दाखल्यांसाठी त्यांना नव्याने कागदपत्रे सादर करावी लागणार आहेत. तसेच दाखल्यांच्या वापरावरदेखील सुधार करावा लागणार असल्याने तहसील कार्यालयाच्या कारभाराचा फटका स्थानिकांना बसला आहे.