वज्रेश्वरी, ता. २ (बातमीदार): निसर्गाच्या लहरीपणामुळे बाजारात रानमेव्याची आवक कमी झाली आहे. अशातच वृक्षतोड, सततच्या अवर्षणग्रस्त स्थितीमुळे यंदा जांभूळ उत्पादनात घट झाली असून, वातावरण पोषक नसल्याने गावरान जांभूळ दुर्मिळ झाले आहेत.
शिरसाड अंबाडी मार्ग तसेच अंबाडी बाजार, वज्रेश्वरी, गणेशपुरी येथील बाजारात जांभूळ दाखल झाला आहे, पण हवामानातील बदलाने आंबा, काजू उत्पादनाप्रमाणे जांभळाचा हंगाम यंदा उशिरा सुरू झाला आहे. सध्या उत्पादीत जांभळाला मागणी असल्याने भाव वाढलेले आहेत. ग्रामीण भागात सध्या विविध खेड्यापाड्यातून तसेच कर्नाटक सीमेवरील जांभळाची आवक सुरू झाली आहे. जांभळामध्ये लोह, कॅल्शिअम, फॉस्फरस, क जीवनसत्व यांचे प्रमाण अधिक असते. तसेच जांभळाच्या बियांत ग्लुकोसाईड जांबोलिन प्रकार असल्याने डायबेटीस रुग्णांसाठी ही फळे उपयुक्त ठरतात. त्यामुळे हंगामात जांभळू विक्रीतून २० ते ३० हजारांची कमाई होत असल्याचे विक्रेता सुमन गहला यांनी सांगितले, तर मधुमेहावर जांभूळ अत्यंत गुणकारी असल्याचे डॉ. प्रशांत राठोड यांनी सांगितले.
------------------------------------------------
जुनी झाडे नामशेष
जांभळाची चव गोड-तुरट असून, आयुर्वेदाच्या दृष्टिकोनातून या फळाचे महत्त्व आहे. उन्हाळ्याच्या शेवटी तसेच पावसाळ्याच्या सुरुवातीला जांभळाची बाजारात आवक होण्यास सुरुवात होते. या फळाचा हंगाम कमी दिवसांचा असतो. वर्षा ऋतूत जांभूळ फळ अमृताप्रमाणे असते, पण वातावरणातील बदलांमुळे तसेच वृक्षतोडीमुळे जांभळाची जुनी झाडे कमी झालेली आहेत. तसेच नवीन प्रजातीच्या झाडांना फारशी वाढ नसल्याने आवक घटली आहे.