सकाळ वृत्तसेवा
ठाणे, ता. ३ : मुंबई-नाशिक महामार्गावरील कॅडबरी तसेच माजिवडा उड्डाणपुलावर एकाच दिवशी एका महिलेसह दोन पुरुषांचे मोबाईल फोन चोरी गेले आहेत. याप्रकरणी राबोडी पोलिस ठाण्यात गुन्हा नोंदवण्यात आला आहे.
मिरा रोड येथे राहणारे जितेंद्र शर्मा रविवारी (ता. १) रात्री भांडुप येथून रिक्षाने घरी जात होते. ज्युपिटर हॉस्पिटलसमोरील पाठीमागून दुचाकीवरून आलेल्या दुकलीने त्यांच्या हातातून मोबाईल फोन हिसकावून भिवंडीच्या दिशेने पोबारा केला. याप्रकरणी त्यांनी राबोडी पोलिस ठाण्यात तक्रार नोंदवण्यात आली आहे. तर मुलुंड येथे राहणाऱ्या जैना शहा (२८) यांचा मोबाईल फोन चोरीला गेला आहे. मिरा रोड येथून मुलुंडला रिक्षाने जाताना कॅडबरी उड्डाणपुलावर हा प्रकार घडला होता. तर रघुनाथनगर येथील राहुल म्हस्के कापूरबावडीच्या दिशेने जाताना माजिवडा उड्डाणपुलाच्या चढणीवर चोरट्यांनी त्यांचा मोबाईल हिसकावला होता. याप्रकरणी राबोडी पोलिस ठाण्यात गुन्हा दाखल करण्यात आला आहे.