मुरबाड (वार्ताहर)ः जागतिक पर्यावरणदिनाच्या निमित्ताने किसळ-पारगाव ग्रामपंचायतीत दोन हजार झाडांची लागवड करण्यात आली आहे. इंप्का, ग्रामपंचायत किसळ-पारगाव आणि आरएससीडी (रिसोर्स अँड सपोर्ट सेंटर फॉर डेव्हलपमेंट) संस्थांच्या संयुक्त विद्यमाने हा उपक्रम राबवण्यात आला.
या कार्यक्रमात ग्रामपंचायत ग्रामसेविका, ग्रामपंचायत सदस्य, पेसा मोबिलायझर, आशा वर्कर्स, अंगणवाडी सेविका, शेतकरी वर्ग, जैवविविधता समिती सदस्य सहभागी झाले होते. या मोहिमेचा उद्देश केवळ झाडे लावणे नसून ग्रामविकासात पर्यावरणपूरक दृष्टिकोन रुजवणे आणि भविष्यातील पिढ्यांसाठी नैसर्गिक संपत्ती जपणे हा आहे. पर्यावरणपूरक अशा उपयुक्त झाडांची निवड करून लागवड केली जाणार आहे.