सानपाड्ड्यात कचऱ्याच्या ढिगाऱ्यामुळे दुर्गंधी
परिसरातील नागरिकांची गैरसोय; रोगराई पसरण्याची भीती
जुईनगर, ता. ७ (बातमीदार) : सानपाडा सेक्टर ९ येथील मिलेनियम टॉवरसमोरील पदपथावरील कचऱ्याच्या ढिगाऱ्यामुळे स्‍थानिकांमधून तीव्र नाराजी व्यक्त केली जात आहे. या कचऱ्याच्या ढिगाऱ्यामुळे परिसरात रोगराई पसरण्याची भीती व्‍यक्‍त केली जात आहे. पालिका डी विभाग कार्यालय हाकेच्या अंतरावर असूनदेखील याकडे दुर्लक्ष होत असल्याने नाराजी व्‍यक्‍त केली जात आहे.
शहराचे शिल्पकार हे ब्रीद वाक्य असलेल्या सिडकोने १९७२ पासून येथील जमीन संपादन करून नवी मुंबई उभारण्याचे काम सुरू केले. त्यांनी ठाणे- बेलापूर पट्ट्यात अत्यल्प उत्पन्न गटापासून उच्च उत्पन्न गटासाठी घरे बांधली. त्यात सानपाडा येथे सिडकोकडून एकमेव उच्च उपन्न गटासाठी बांधलेली घरे आहेत. त्या वेळी सानपाडा येथे बांधण्यात आलेल्या प्रशस्त आणि उंच इमारती नागरिकांचे आकर्षण ठरले होते. मात्र येथे नागरी-सोयीसुविधांचा अभाव असल्याने नागरिक हैराण झाले आहेत. येथील मिलेनियम टॉवरसमोरील पदपथावर मोठ्या प्रमाणात कचऱ्याचा ढिगारा साचल्याने परिसरात दुर्गंधी पसरली आहे. शिवाय पाटील मैदान आणि सेन्सर उद्यान जवळच असल्याने परिसरात नागरिकांची ये-जा असते. शिवाय वेस्टर्न कॉलेज आणि रेयान हायस्कूलमध्ये जाणारे विद्यार्थी तसेच एमटीएनएलचे ग्राहक या पदपथाचा वापर करतात. मात्र येथून ये-जा करणाऱ्या नागरिकाला नाकावर रुमाल ठेवून प्रवास करावा लागत आहे. या ठिकाणी छाटणी केलेल्या फांद्या तशाच पडून राहिल्याने काही उपद्रवी नागरिक याचा फायदा घेत कचरा आणून टाकत आहेत. त्यामुळे छाटणी केलेल्या फांद्या त्वरित उचलल्या गेल्यास या ठिकाणी होणारा कचरा कमी होईल, असे बोलले जात आहे. शिवाय पावसाच्या पाण्यामुळे तो कुजत असल्याने जीवजंतू होण्याची भीती व्‍यक्‍त केली जात आहे. आमचा परिसर राहण्यासाठी खूपच चांगला आहे. शिवाय आम्ही परिसरात झाडे लावून त्यांचे संगोपन करून परिसर स्वछ ठेवण्याचा प्रयत्न करतो. मात्र काही अस्वछ वृत्ती असलेल्या लोकांकडून शहरे विद्रूप करण्याचा प्रकार होत आहे, असे येथील स्‍थानिक रहिवासी चंद्रकांत सरनोबत यांनी सांगितले.