सकाळ वृत्तसेवा
ठाणे, ता. ८ : अपघातात बेशुद्ध असलेल्या व्यक्तीची दुचाकी चोरीला गेल्याची घटना ठाणे शहरात घडली आहे. याप्रकरणी श्रीनगर पोलिस ठाण्यात दुचाकी चोरणाऱ्यांविरोधात गुन्हा दाखल करण्यात आला आहे.
बीकेसी पार्किंगचे सुपरवायझर राजेश सिंह वागळे इस्टेटमधील पडवळनगर येथे राहतात. वागळे इस्टेट रोड नंबर १६ येथील एका बँकेतून ३० मे रोजी दुपारी दुचाकीने घरी जात असताना त्यांना भरधाव टीएमटी बसने जोरदार धडक दिली. या अपघातात रस्त्यालगत उभ्या असलेल्या कारला त्यांची दुचाकी धडकली. या अपघातानंतर खांद्याला दुखापत झालेले सिंह भोवळ येऊन बेशुद्ध पडले. उपचारानंतर सिंह यांना रुग्णालयातून घरी सोडण्यात आले. दरम्यान, घटनास्थळावरून त्यांची दुचाकी चोरीला गेली आहे. त्यामुळे बसचालक तसेच दुचाकी चोरणाऱ्याविरोधात श्रीनगर पोलिस ठाण्यात तक्रार नोंदवली आहे.