सोमय्या विद्यापीठात प्रमाणपत्र ते पदव्युत्तरपर्यंत विविध भाषा शिकण्याची संधी
मुंबई, ता. १० : सोमय्या विद्याविहार विद्यापीठात मराठी भाषेसह हिंदी, गुजराती, इंग्रजी भाषेसोबत जर्मन, फ्रेंच, स्पॅनिश, इटालियन, जपानी, मॅन्डरिन (चिनी), उर्दू प्रमाणपत्र अभ्यासक्रमापासून ते थेट पदवी आणि पदव्युत्तर भाषाविषयक अभ्यासक्रम सुरू होत आहेत.
राष्ट्रीय शैक्षणिक धोरणाच्या पार्श्वभूमीवर मराठी, गुजराती, हिंदी या आधुनिक भारतीय भाषांना आलेले महत्त्व आणि या भाषांच्या जाणकारांसाठी असलेल्या संधी लक्षात घेऊन चार नवे पदव्युत्तर अभ्यासक्रम विद्यापीठाच्या भाषा विभागातर्फे सुरू करण्यात येत आहेत.
एमए मराठी भाषा, साहित्य आणि उपयोजित मराठी, एमए गुजराती साहित्य, अनुवाद आणि प्रसारमाध्यमे आणि एमए हिंदी साहित्य तसेच एमए इंग्लीश लिटरेचर अँड कम्युनिकेशन स्टडीज् असे हे चार अभ्यासक्रम आहेत. यासोबत सध्या कन्टेंट राईटर्सना असलेली मागणी लक्षात घेता डिप्लोमा इन कन्टेंट अँड क्रिएटिव्ह राइटिंग हा एक वर्षाचा पदविका अभ्यासक्रम इच्छुकांसाठी उपलब्ध करून देण्यात आला आहे.
मुख्य म्हणजे इंग्रजीसोबत हिंदी, मराठी, गुजराती या भाषांतूनदेखील विद्यार्थ्यांना तो पूर्ण करता येणार येईल. विविध युरोपीय तसेच आशियाई भाषा शिकण्याची संधीही विद्यापीठ उपलब्ध करून देते आहे. जर्मन, फ्रेंच, स्पॅनिश, इटालियन, जपानी, मॅन्डरिन (चिनी), उर्दू तसेच अन्य भाषकांसाठी कम्युनिकेटिव्ह मराठी आणि गुजराती कम्युनिकेशन स्किल्स असे विविध प्रमाणपत्र अभ्यासक्रम (सर्टिफिकेट कोर्स) सुरू करण्यात येत आहेत. यासाठी इच्छुक विद्यार्थ्यांनी अधिक माहितीसाठी https://fll.somaiya.edu/en या संकेतस्थळाला भेट द्यावी, असे आवाहन विद्यापीठाकडून करण्यात आले आहे.