ठाणे जिल्ह्यात नेत्रदानदिन पंढरवडा साजरा करणार
काचबिंदू, मोतीबिंदूच्या होणार मोफत शस्त्रक्रिया
ठाणे शहर, ता. १० (बातमीदार)ः जागतिक नेत्रदानदिनानिमित्ताने ठाण्यात विविध ठिकाणी जनजागृती पंढरवडा साजरा केला जात आहे. या कालावधीत वैद्यकीय संस्था, स्वयंसेवी संघटना, रुग्णालये आणि शाळा-महाविद्यालयांमध्ये नेत्रदानाविषयी जनजागृती उपक्रमांचे आयोजन केले आहे. नागरिकांनी मोठ्या संख्येने पुढे येऊन नेत्रदान करण्याचे आवाहन केले आहे.
नेत्रदानदिन पंधरवड्यात ठाणे जिल्हा रुग्णालयात पुढील १५ दिवस जनजागृती कार्यक्रमाबरोबर मोतीबिंदू, काचबिंदू आदींची अत्याधुनिक मशीनद्वारे मोफत शस्त्रक्रिया पार पडणार आहेत. सुप्रसिद्ध नेत्रतज्ज्ञ डॉ. आर. ए. भालचंद्र यांच्या स्मृतिप्रीत्यर्थ या दिनाचे आयोजन करण्यात येते. ठाणे जिल्हा रुग्णालयात जिल्हा शल्यचिकित्सक डॉ. कैलास पवार अतिरिक्त जिल्हा शल्यचिकित्सक डॉ. धीरज महांगडे यांच्या मार्गदर्शनाखाली नेत्रदान पंधरवडा साजरा करण्यात येणार असल्याची माहिती नेत्रतज्ज्ञ डॉ. शुभांगी अंबाडेकर यांनी दिली.

नेत्रदान आशेचा किरण
तर दृष्टी गमावलेल्या रुग्णांसाठी नेत्रदान हा उपक्रम आशेचा किरणं ठरू शकतो, त्यामुळे जागतिक नेत्रदानदिनानिमित्त ‘मृत्यूनंतर डोळे दान करा, कुणाला तरी प्रकाश द्या’ हा संदेश देणं ही प्रत्येक नागरिकाची जबाबदारी आहे, असे जिल्हा शल्यचिकित्सक डॉ. कैलास पवार यांनी सांगितले.

नेत्रतज्ज्ञांच्या मते, दररोज किमान दोन लिटर पाणी प्यावे, अर्ध्या तासाने डोळ्यांना विश्रांती द्यावी आणि कमी प्रकाशात वाचन टाळावे. हे उपाय केल्यास डोळ्यांचे आरोग्य दीर्घकाळ टिकवता येते.
- डॉ. शुभांगी अंबाडेकर, नेत्रतज्ज्ञ, जिल्हा रुग्णालय