‘त्या’ शाळांमधील विद्यार्थी समायोजनाकडे पाठ
उन्हाळी सुट्ट्यांमुळे पालिकेपुढे पेच
सकाळ वृत्तसेवा
ठाणे, ता. १० : अनधिकृत शाळांवर ठाणे पालिकेकडून कारवाई करीत बंद करण्यात आल्या आहेत. तसेच या शाळांतील विद्यार्थ्यांचे अधिकृत शाळांमध्ये समायोजन करण्यासाठी शिक्षण विभागाने हालचाली सुरू केल्या होत्या. परंतु, अनधिकृत शाळांच्या पालकांची मान्यताप्राप्त शाळांमध्ये समायोजनास करण्यास उदासीनता दिसून आली आहे. अधिकृत शाळांची फीदेखील परवडणारी नसल्याने पालकांमध्ये उदासीनता दिसून येत आहे. उन्हाळी सुट्टी असल्याने पालक गावी गेल्याने त्यांचा संपर्क होत नसल्यामुळे प्रशासनापुढे पेच निर्माण झाला आहे.
ठाणे पालिका क्षेत्रातील अनधिकृत शाळांचा आढावा घेऊन पालिका आयुक्त सौरभ राव यांनी त्यावर कारवाईचे आदेश दिले होते. त्यानंतर पालिका प्रशासनाने कारवाईचा बडगा उगारत ८१ अनधिकृत शाळांविरोधात पोलिस ठाण्यात तक्रारी दिल्या. त्यापैकी ६८ शाळांवर गुन्हे दाखल झाले आहेत, तर १३ शाळांवर गुन्हा दाखल करण्याची प्रक्रिया सुरू होती. या शाळांमधून १९ हजार ७०८ विद्यार्थी शिक्षण घेत असल्याची माहिती समोर आली होती. ज्या अनधिकृत शाळा सुरू आहेत त्या तत्काळ बंद करून त्याचा अहवाल सादर करावा, अशा सूचनाही शिक्षण विभागाने संबंधित शाळा व्यवस्थापनाला केल्या आहेत.
शिवाय येथील विद्यार्थ्यांचे समायोजन इतर मान्यताप्राप्त शाळांमध्ये करण्यासाठी महापालिकेच्या शिक्षण विभागाने पावले उचलली आहेत. त्यानुसार शिक्षण विभागाकडून अनधिकृत शाळांतील विद्यार्थ्यांच्या पालकांना नोटिसीद्वारे मान्यताप्राप्त शाळेत समायोजन करण्याच्या दृष्टीने बैठक आयोजित केली होती. दिव्यात सर्वाधिक अनधिकृत शाळा आहेत. त्याच शाळेतील विद्यार्थ्यांच्या पालकांनी या बैठकीकडे पाठ फिरविल्याचे चित्र दिसून आले आहे.

प्रशासनापुढे अडचणींचा डोंगर
शाळा सुरू होण्यास अगदी तीन ते चार दिवसांचा अवधी शिल्लक असतानाही १९ हजारांपैकी अगदी हाताच्या बोटावर मोजता येतील एवढ्याच विद्यार्थ्यांचे समायोजन इतर शाळांमध्ये करण्यात आले आहे. त्यातही इतर मान्यताप्राप्त शाळांमध्ये शिकविण्यासाठी अनेक पालकांची ऐपत नसल्यानेही त्यांनी याकडे पाठ फिरविल्याचे दिसून आले आहे. दुसरीकडे उन्हाळी सुट्टी सुरू आहे. अनेक शाळा बंद असल्यामुळे पालक व विद्यार्थ्यांपर्यंत पोहोचण्यात अडचणी येत असून, पालिकेपुढे पेच निर्माण झाला आहे.

अनधिकृत शाळांमधील विद्यार्थ्यांचे इतर मान्यताप्राप्त शाळांमध्ये समायोजन करण्याचे आमचे प्रयत्न सुरू आहेत. त्यानुसार काही विद्यार्थ्यांचे समायोजन झालेले आहे. तसेच अनधिकृत शाळांमध्ये प्रवेश घेऊ नये, यासाठी फलक लावून जनजागृती करण्यात येत आहे. तसेच पालकांचे समाजमाध्यमावर व्हॉटसॲप ग्रुप तयार करून त्या माध्यामतूनदेखील संवाद साधण्याचा प्रयत्न करीत आहे, असे ठाणे पालिका शिक्षण विभागाचे उपायुक्त सचिन सांगळे यांनी म्हटले आहे.