माळशेज घाटात भातपेरणीला वेग
टिटवाळा, ता. ११ (वार्ताहर) : यंदा पावसाला लवकरच सुरुवात झाल्याने माळशेज घाटमाथ्यावरील शेतकऱ्यांनी मेअखेरीसच भातपेरणी सुरू केली आहे. अनेक ठिकाणी हे काम पूर्णत्वास गेले आहे. पावसाची लक्षणीय उपस्थिती आणि जमिनीतील भरपूर ओलावा यामुळे या भागातील शेतकऱ्यांनी पारंपरिक व बैलांच्या सहाय्याने पेरणी केली.

राज्य सरकारने १५ जूननंतर पावसाचा अंदाज घेऊन भातपेरणी करावी, असे आवाहन शेतकऱ्यांना केले होते; मात्र यंदा मे महिन्यातच मुसळधार पावसाने राज्यात हजेरी लावली. काही भागांत पूरस्थितीही उद्भवली. अशा स्थितीत माळशेज घाट परिसरातील शेतकऱ्यांनी पुढाकार घेत स्वतःच्या अनुभवावर आधारित निर्णय घेत पेरणीचे काम वेळीच सुरू केले. शेतकऱ्यांनी आपल्या कुटुंबासह विविध पारंपरिक साधनसामग्री बैलजोडी, कुदळ, पंजा यांचा वापर करत शेतीकाम पूर्ण केले. फांगुळगव्हाण, निरगुडपाडा, साखरवाडी, भोरांडे, शिसवेवाडी, भोईरवाडी, फांगणे अशा गावांमध्ये मोठ्या प्रमाणावर या पेरण्या झाल्याची माहिती स्थानिकांकडून मिळाली. जमिनीला पुरेसा ओलावा आहे आणि वरुणराजा वेळेपूर्वीच दाखल झाल्यामुळे आम्ही पेरणी केली, असे संतोष पारधी, सुदाम भला व किरन कारभळ यांनी सांगितले.