श्रीकांत खाडे : सकाळ वृत्तसेवा
अंबरनाथ, ता. १० : सध्याच्या शिक्षण क्षेत्रातील स्पर्धात्मक युगात नगरपालिका शाळेमध्ये फारसे कोणी प्रवेश घेत नाहीत; मात्र अंबरनाथ नगरपालिका शाळेच्या आकर्षक, सुसज्ज आणि डिजिटल शाळेचा नवा लूक पाहून शाळेची पटसंख्या वाढली आहे. शाळेतील विद्यार्थ्यांना नवे गणवेश, वह्या, पुस्तकांप्रमाणे शाळाही नवीनच मिळणार आहे.
अंबरनाथ नगरपालिकेच्या १७ शाळांपैकी शाळा क्रमांक एक या लोकल बोर्ड नावाने ओळखल्या जाणाऱ्या शाळेने कात टाकली आहे. वैशिष्ट्यपूर्ण अनुदानातून अंदाजे १० कोटी रुपये खर्चून शाळेच्या नव्या इमारतीच्या बांधकामाला तत्कालीन प्रशासक डॉ. प्रशांत रसाळ यांच्या आदेशानुसार मागील वर्षी ऑगस्ट महिन्यात सुरुवात करण्यात आली. अवघ्या आठ महिन्यांत शाळेची परिपूर्ण दुमजली इमारत अंबरनाथकरांचे आकर्षण ठरली आहे. या इमारतीमध्ये शाळा नंबर १ आणि १३; तसेच तामिळ शाळा अशा तीन एकत्र भरणार आहेत.
खासदार डॉ. श्रीकांत शिंदे, आमदार डॉ. बालाजी किणीकर यांच्या मार्गदर्शनाखाली स्थानिक नगरसेवक अब्दुल शेख यांच्या पाठपुराव्यातून शाळा बांधण्यात आली आहे. शेख आणि पालिका अधिकाऱ्यांच्या उपस्थितीमध्ये शाळेचे भूमिपूजन करण्यात आले होते. पहिली ते आठवीपर्यंत चालणाऱ्या शाळेत शाळा नंबर एकची पटसंख्या ९७ होती. तर शाळा नंबर १३ ची पटसंख्या २७ होती. तामिळ भाषिक शाळेची पटसंख्या ७७ होती. शाळेने प्रशस्त आणि आधुनिकतेची कास धरून केलेले बदल, आकर्षक इमारत, खेळायला मैदान या सर्व गोष्टींमुळे शाळा क्रमांक एकची पटसंख्या १५०, शाळा क्रमांक १३ ची ६०च्या आसपास झाली आहे. याशिवाय सीनियर केजी आणि ज्युनियर केजी वर्गात ४० विद्यार्थ्यांनी प्रवेश घेतला आहे. जावसई येथील महेंद्रनगर येथे युवा युनिटी फाउंडेशनच्या वतीने चालवण्यात येणाऱ्या शाळेतील ४० लहान विद्यार्थ्यांनी शाळेत प्रवेश घेतला आहे. अन्य विद्यार्थ्यांचाही ओघ या शाळेकडे वाढत चालला आहे.
या शाळेचे उद्‍घाटन उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या उपस्थितीत शुक्रवारी (ता. १३) अथवा शनिवारी होणार आहे, अशी माहिती स्थानिक माजी नगरसेवक अब्दुल शेख यांनी दिली.

वर्गखोल्या झाल्या बोलक्या
सीनियर आणि ज्युनियर केजीच्या वर्गात विविध प्रकारचे प्राण्यांची रंगीत छान चित्रे रेखाटली आहेत. वर्गखोल्यांना रंगरंगोटीशिवाय शाळेच्या नियमांची माहिती देण्यात आली आहे. आठवड्याचे वार किती अशी उद्बोधक माहिती, सोबतीला आकर्षक रंगीबेरंगी बाकड्यांमुळे शाळा नगरपालिकेची आहे का खासगी असा प्रश्न पडल्यावाचून राहात नाही.

सोयी-सुविधांयुक्त शाळा
शिक्षक आमदार ज्ञानेश्वर म्हात्रे यांनी शाळेला डिजिटल बोर्ड दिले आहे. त्याद्वारे विद्यार्थ्यांना हायटेक शिक्षणाची संधी उपलब्ध होणार आहे. मुख्याधिकारी उमाकांत गायकवाड यांनी पालिकेच्या सर्व शाळांमध्ये सीसी कॅमेरे बसवण्याचा निर्णय घेतला आहे. त्यानुसार एक नंबर शाळेत सीसी कॅमेऱ्याची नजर राहणार आहे. दुमजली शाळेमध्ये शिक्षकांसाठी सर्व सोयींयुक्त स्टाफ रूम, विद्यार्थ्यांना पिण्याच्या पाण्याची सोय, स्वच्छतागृहाची सुविधा उपलब्ध केली आहे. याशिवाय, शाळेच्या परिसरात विविध प्रकारची झाडे लावण्यात आली असून, परसबागेत फुले आणि भाज्यांची लागवड करण्यासाठी मोकळी जागाही आहे.