अंधेरी नागरदास मार्गावरील सिग्‍नल यंत्रणा पुन्‍हा सुरू
जोगेश्‍वरी, ता. १२ (बातमीदार) ः वाढत्या लोकसंख्येमुळे शहरात वाहनांची संख्या वाढल्याने वाहतूक कोंडीचा प्रश्नही गंभीर बनला आहे. त्‍यातच अंधेरी नागरदास मार्गावरील सिग्‍नल यंत्रणा बंद असल्‍याने वाहनचालकांची गैरसोय सुरू होती. याबाबत ‘सकाळ’च्या सोमवारच्या (ता. ९) अंकात वृत्त प्रकाशित करण्यात आले होते. याची दखल घेत येथील सिग्‍नल यंत्रणा पुन्हा सुरू करण्यात आली आहे. त्‍यामुळे वाहनालकांना दिलासा मिळाला आहे.
शहरात अनेक ठिकाणी सिग्नल यंत्रणा बसवली आहे. तसेच काही अपघातप्रवण स्थळांवर नव्याने अद्ययावत सिग्नल यंत्रणाही बसविण्यात आली; मात्र कित्येक महिन्यांपासून येथील सिग्‍नल यंत्रणा बंदच आहेत. अंधेरी पूर्वेत जिजामाता चौक, पंपहाउस, सर्व्हिस रोड, पूर्व-पश्‍चिम द्रुतगती मार्ग, जुना व नवीन नागरदास रस्ता या ठिकाणी प्रशासनाने लाखो रुपये खर्चून सिग्‍नल यंत्रणा बसवली आहे.
नागरदास रस्त्यावरील मुख्य अद्ययावत मोठी सिग्‍नल व्यवस्था गेल्‍या अनेक महिन्यांपासून बंद असल्याने याचा नाहक त्रास वाहनचालकांप्रमाणे पादचाऱ्यांना सहन करावा लागत होता, तर अंधेरी स्थानकावरून महामार्गाकडे तसेच सबवेकडे जाणाऱ्या वळणावरील मुख्य सिंग्‍नल यंत्रणा बंद असल्याने येथे दररोज वाहतूक कोंडी होत होती. याबाबत पालिका प्रशासन व वाहतूक पोलिस शाखा यांच्याकडे अनेकदा नागरिकांनी तक्रारी केल्या होत्‍या, तर काही सिग्नल्सवर वाहतूक पोलिसही नाहीत. याबाबत वृत्त प्रकाशित केल्‍यानंतर सहार वाहतूक विभागाने याची तातडीने दखल घेत नादुरूस्‍त सिग्‍नल यंत्रणा दुरूस्‍त केली. अनेक महिने बंद असलेली सिंग्‍नल यंत्रणा व्‍यवस्थित पुन्‍हा सुरू झाल्‍याने येथील वाहतूक कोंडी दूर झाली आहे.