आरक्षण वाढीसाठी शिफारस करणार
कांदिवली, ता. ११ (बातमीदार) : महाराष्ट्रातील अनुसूचित जाती आणि अनुसूचित जमातींसाठी सर्व महापालिका, नगरपालिका, जिल्हा परिषद, पंचायत समितीमध्ये सरसकट १३ व ७ टक्के अनुक्रमे आरक्षण द्यावे, अशी शिफारस राज्य शासनाकडे करण्यात येणार आहे, असे महाराष्ट्र राज्य अनुसूचित जाती जमाती आयोगाचे उपाध्यक्ष धर्मपाल मेश्राम यांनी सांगितले आहे. मुंबई महापालिकेपेक्षा छोट्या पालिकांमध्ये अनुसूचित जातीच्या प्रभागांचे आरक्षणाचे प्रमाण अधिक आहे. मुंबई महापालिकेत अनुसूचित जातींचे फक्त १३ प्रभाग (वार्ड) आहेत. समता परिषद मुंबईच्या वतीने माजी मंत्री विजयभाई गिरकर यांनी आपल्या शिष्टमंडळासह धम्मपाल मेश्राम यांना लेखी निवेदन देत ही तफावत निदर्शनास आणून दिली होती. मुंबई पालिकेतील अनुसूचित जातीच्या वॉर्डसंदर्भात माजी मंत्री भाई गिरकर, विविध संघटना, प्रशासकीय अधिकारी यांची महाराष्ट्र राज्य अनुसूचित जाती जमाती आयोगाकडे बैठक झाली. या बैठकीस विधी व न्याय विभागाच्या सहसचिव अश्विनी सैनी यांच्यासह विविध संघटनांचे पदाधिकारी उपस्थित होते.