विरार (बातमीदार) : समाजाच्या सुख-दुःखात आपले सुख मानणारा माणूस म्हणजे दत्तात्रेय पाटील होय. हा माणूस समाजातील कोणीही मरण पावले की, सर्वात अगोदर त्या ठिकाणी पोहोचतो आणि अंत्यविधीची तयारी करतो. हे काम करून तो समाजाची वेगळी सेवा करत आहे. क्रिकेट असो अथवा चंडिका देवी यात्रेतील कुस्ती असो, त्या ठिकाणीही दत्तात्रेय पाटील पुढे असतात, असे गौरवोद्गार माजी आमदार हितेंद्र ठाकूर यांनी काढले. ते वाकीपाडा (जुचंद्र) गावचे राजकीय, सामाजिक, कला-क्रीडा क्षेत्रात सतत कार्यरत असलेले ज्येष्ठ कार्यकर्ता दत्तात्रेय नारायण पाटील यांच्या अमृतमहोत्सव सोहळ्यात बोलताना होते. या कार्यक्रमात उपस्थितांनी दत्तात्रय पाटील यांच्याबद्दल आठवणी व त्यांनी केलेल्या समाजकार्यांच्या आठवणींना उजाळा दिला. या कार्यक्रमाला माजी महापौर राजीव पाटील, काँग्रेसचे नेते विजय पाटील, भाईंदरचे माजी नगरसेवक रोहिदास शंकर पाटील, माजी महापौर नारायण मानकर, प्रवीण शेट्टी, माजी खासदार बळीराम जाधव, माजी सभापती प्रभाकर म्हात्रे आदी उपस्थित होते.