अंबरनाथ (वार्ताहर) : रेल्वेस्थानकाचा अंदाज न आल्याने पाय घसरून एक दिव्यांग व्यक्ती रुळावर पडून जखमी झाल्याची घटना अंबरनाथमध्ये घडली होती. ही घटना सीसीटीव्हीत कैद झाली. घटनेचा व्हिडिओ व्हायरल होत आहे. या व्हिडिओत दिव्यांगाचे प्राण एमएसएफ जवानाच्या सतर्कतेमुळे वाचल्याचे सीसीटीव्हीतून स्पष्ट होत आहे. महाराष्ट्र सुरक्षा फोर्स (एमएसएफ) जवान अमोल देवरे यांच्या धाडसाचे आणि कर्तव्य दक्षतेचे सर्वत्र कौतुक होत आहे. मुंबई महापालिकेचे कर्मचारी सिद्धनाथ माने हे वांगणी येथे राहतात. ते २ जूनला संध्याकाळी सातच्या सुमारास सीएसटीवरून कर्जत दिशेने जाणाऱ्या लोकलची वाट पाहत होते. याचवेळी स्थानकावर लोकल आल्याची घोषणा झाली आणि ते लोकल पकडण्यासाठी पुढे सरसावले. मात्र, स्थानकाचा अंदाज न आल्याने त्यांचा पाय घसरून ते रुळावर कोसळले. माने पडल्याचे निदर्शनास येताच देवरे यांनी सर्वांत आधी लोकल थांबवली. रुळाकडे धाव घेऊन माने यांना तेथून हटवत प्राण वाचवले. या वेळी काही प्रवाशांनीही त्यांची मदत केली. माने गंभीय जखमी झाल्याने त्यांना तत्काळ रुग्णालयात दाखल करण्यात आले.