‘अदाणी’ला आणखी
टीडीआर : गायकवाड
सकाळ वृत्तसेवा
मुंबई, ता. ११ : धारावी पुनर्विकास प्रकल्पांतर्गत ‘अदाणी’ने आणखी १३.३९ लाख चौरस फूट विक्रीयोग्य क्षेत्र टीडीआर स्वरूपात मागितल्याचा दावा काँग्रेसच्या खासदार वर्षा गायकवाड यांनी केला आहे. ‘अदाणी’ने न बांधलेल्या घरांच्या बदल्यात हा टीडीआर त्यांना दिला जाण्याची शक्यता आहे, असा आरोपही त्यांनी केला आहे.

म्हाडाने धारावीकरांसाठी पाच वर्षांपूर्वी पाच इमारती उभारून एक हजार ३३२ घरे बांधली आहेत. ही घरे काँग्रेस आघाडी सरकारच्या २०११ मधील धारावीच्या मूळ सेक्टरनिहाय पुनर्विकास मॉडेलअंतर्गत धारावी सेक्टर-५ मध्ये उभारण्यात आली आहेत. २०१८ पर्यंत म्हाडाने पात्रता सर्वेक्षण करून लाभार्थी निश्चित करून तीन पुनर्वसन इमारती पूर्ण केल्या. इतर दोन इमारतींचे बांधकाम २०२० मध्ये पूर्ण झाले. पाच वर्षांपासून तयार असलेल्या या घरांच्या चाव्‍या अद्याप रहिवाशांना दिलेल्या नाहीत. आता या इमारती अदाणी डीआरपीच्या माध्यमातून ताब्यात घेऊन बांधकाम आणि जमिनीचा खर्च भरणार आहे. त्या बदल्यात शेकडो कोटींच्या १३.३९ लाख चौरस फूट टीडीआरची मागणी करण्यात आल्याचा दावा खासदार गायकवाड यांनी केला.