मृत अर्भकाला पिशवीत घालून ९० किलोमीटरचा प्रवास
बेजबाबदार आरोग्यसेवेचे पुन्हा एकदा दर्शन
भगवान खैरनार ः सकाळ वृत्तसेवा
मोखाडा, ता. १३ ः मोखाडा तालुक्यात माता-बालमृत्यू प्रकरण थांबण्याचे नाव घेत नसून बेजबाबदार आरोग्यसेवेचे पुन्हा एकदा दर्शन झाले आहे. गर्भवती महिलेला प्रसूतिकळा सुरू झाल्यावर वेळेवर रुग्णवाहिका उपलब्ध न झाल्याने तिचे बाळ पोटातच दगावले. एवढेच नव्हे तर नाशिकहून गावी मृत अर्भक आणण्यास शववाहिकाही उपलब्ध झाली नसल्याने वडिलांनी अखेर मृत अर्भक पिशवीत घालून ९० किलोमीटरचा प्रवास एसटीने करीत घर गाठले. या घटनेवर सर्वच स्तरातून संताप व्यक्त होत आहे.
जोगलवाडी येथील गर्भवती महिला अविता सखाराम कवर (वय २६) हिला बुधवारी (ता. ११) पहाटे तीन वाजण्याच्या सुमारास प्रसूतिकळा येऊ लागल्याने १०८ वर कॉल केला; परंतु रुग्णवाहिका उपलब्ध नसल्याने अखेर दुपारी खासगी वाहनाने गर्भवती महिलेस खोडाळा आरोग्य केंद्रात दाखल करण्यात आले; परंतु उपचारादरम्यान बाळाच्या हृदयाचे ठोके ऐकू येत नसल्याने अविताला मोखाडा ग्रामीण रुग्णालयात हलवण्याचा निर्णय वैद्यकीय अधिकाऱ्यांनी घेतला. दरम्यान, खोडाळा येथील रुग्णालयातही रुग्णवाहिका उपलब्ध नसल्याने आसे उपकेंद्रातून मागविण्यात आली. सायंकाळी मोखाडा ग्रामीण रुग्णालयात अविताला दाखल केले असता बाळाचा पोटातच मृत्यू झाल्याचे वैद्यकीय अधिकाऱ्यांनी सांगितले व पुढील उपचारासाठी नाशिक जिल्हा रुग्णालयात पाठविण्यात आले.
नाशिकच्या जिल्हा शासकीय रुग्णालयात शस्त्रक्रिया करून मृत अर्भक बाहेर काढले आणि मातेला वाचवण्यास डॉक्टरांना यश आले; मात्र गुरुवारी (ता. १२) जिल्हा रुग्णालयात मृत अर्भकास घरी नेण्यास शववाहिका उपलब्ध झाली नाही. अखेर, अविताचे पती सखाराम कवर यांनी मृत अर्भक पिशवीत टाकून बसने ९० किलोमीटरचा प्रवास केला आणि त्याच्यावर अंत्यसंस्कार केले. या घटनेवर सर्वत्र हळहळ आणि संताप व्यक्त करण्यात आला आहे.

पोलिसांची मृत अर्भकाच्या वडिलांस मारहाण
वेळेत रुग्णवाहिका आणि उपचार न मिळाल्याने सखाराम कवर याने खोडाळा प्राथमिक आरोग्य केंद्रात मद्यप्राशन करून वैद्यकीय अधिकाऱ्यांना जाब विचारला. या वेळी वैद्यकीय अधिकारी अश्विनी मोरे यांनी पोलिसांना पाचारण केले. पोलिसांनी घटनेची माहिती न घेता सखाराम कवरला मारहाण केली. त्यामुळे या संपूर्ण घटनेची चौकशी करून दोषींवर कारवाई करण्याची मागणी नागरिकांनी केली आहे. या घटनेची माहिती घेण्यासाठी तातडीने जव्हारचे उपविभागीय पोलिस अधिकारी गणपत पिंगळे यांनी खोडाळा प्राथमिक आरोग्य केंद्राला भेट दिली आहे.