मुरबाड, ता.१४ (बातमीदार)ः तालुक्यातील शेतकऱ्यांना शासनाला विकलेल्या भाताची रक्कम मिळालेली नाही. त्यामुळे आठ दिवसात पैसे मिळाली नाहीतर २६ जूनपासून मुरबाड तहसीलदार कार्यालयासमोर उपोषणाचा इशारा रमेश हिंदुराव यांनी दिला आहे. राज्य मंत्रिमंडळाच्या बैठकीत २०२०-२१ मध्ये भातविक्री केलेल्या ठाणे जिल्ह्यातील ५०० शेतकऱ्यांना ८० लाख रुपये बोनस मंजूर केला आहे. पण अजूनही तालुक्यातील अनेक शेतकऱ्यांना भातविक्रीची रक्कम अदा झालेली नाही. त्यामुळे शासनाने शेतकऱ्यांच्या खात्यात तातडीने रक्कम जमा करावी तसेच २०२४-२५ सालासाठी भातविक्रीवर जाहीर बोनस मिळावा, या मागणीसाठी रमेश हिंदुराव यांनी उपोषणाचा इशारा दिला आहे. याबाबतचे पत्र त्यांनी मुख्यमंत्री, उपमुख्यमंत्री, अन्न व नागरी पुरवठा मंत्र्यांना पाठविले आहे.
------------------------------
खरीप हंगामातच चणचण
शेतकऱ्यांना चालू हंगामात बी-बियाणे, खते, कीटकनाशकांची खरेदी तसेच भात शेतीची मशागत करण्यासाठी रकमेची गरज आहे. त्यामुळे ८ दिवसांत शेतकऱ्याच्या खात्यावर पैसे जमा झाली नाहीतर २६ जूनपासून मुरबाड तहसीलदार कार्यालय समोर उपोषणास बसणार असल्याचे निवेदनात म्हटले आहे