मिरा-भाईंदरमध्ये पावसाची दमदार हजेरी
भाईंदर, ता. १६ (बातमीदार) ः मिरा-भाईंदर शहरात पावसाने दमदार हजेरी लावली. काही ठिकाणी सखल भागात या वेळी पाणी साचले आहे. सोमवारी (ता. १६) पावसाला पहाटेपासूनच सुरुवात झाली. सकाळी दहानंतर पावसाचा जोर वाढला; मात्र पाऊस अधूनमधून थांबत होता, त्यामुळे काही सखल भाग वगळता अन्य ठिकाणी पाणी साचले नाही.

भाईंदर पश्चिम येथील बेकरी गल्ली येथे मात्र एक ते दीड फूट पाणी साचले. त्यामुळे इमारतीच्या तळमजल्यावरील अनेक घरांत पाणी शिरून रहिवाशांच्या मालमत्तेचे नुकसान झाले. महापालिका यावर कोणतीही उपाययोजना करीत नसल्याने नागरिकांकडून तीव्र नाराजी व्यक्त करण्यात आली. पावसाचा जोर कमी झाल्यानंतरही याठिकाणचे पाणी अनेक तास ओसरले नव्हते.

उत्तन येथील शिरे रोड येथील एका वृद्धाश्रमाबाहेर असलेले झाड कोसळले. त्यामुळे १५ वयस्कर व्यक्ती आत अडकल्या. अग्निशमन दलाच्या जवानांनी सर्वांना सुखरूप बाहेर काढले. झाड कापून रस्ता मोकळा केला.
--------------------------

फोटो ः भाईंदर पश्चिम येथील बेकरी गल्लीत तुंबलेले पाणी.