पोलादपूर, ता. १६ (बातमीदार) ः दोन दिवसांपासून कोसळणाऱ्या पावसामुळे मुंबई-गोवा महामार्गावरील कशेडी घाटात खेड बोगद्यापासून २०० मीटर अंतरावर दरड कोसळल्याची घटना रविवारी (ता. १५) सायंकाळी साडेसहाच्या सुमारास घडली. यामुळे काही काळ वाहतूक संथ गतीने सुरू होती.
पावसाळ्यामध्ये कशेडी घाटात दरड कोसळण्याच्या घटना दरवर्षी घडतात. महिनाभरापूर्वीही याच ठिकाणी दरड कोसळून वाहतुकीचा खोळंबा झाला होता. रविवारी सायंकाळी पुन्हा दरड कोसळल्याने मुंबईकडे जाणारी वाहतूक एकाच मार्गिकेवरून सुरू होती. घटनेनंतर सुमारे दीड तासाने दरड हटविण्याचे काम सुरू करण्यात आले. कशेडी महामार्ग पोलिस मदत केंद्राच्या कर्मचाऱ्यांनी त्‍वरित घटनास्‍थळी धाव घेत वाहतूक सुरळीत केली.

पोलादपूर-कुडपण रस्त्यावर दरड
पोलादपूर तालुक्‍यात रविवारपासून पावसाचा जोर वाढला असून नद्या-नाले तुडुंब भरून वाहत आहेत. मिनी महाबळेश्वर म्हणून ओळखल्या जाणाऱ्या कुडपण गावच्या हद्दीमध्ये पोलादपूर-कुडपण या मुख्य रस्त्यावरही मातीचा ढिगारा रस्त्यावर आल्याची घटना घडली आहे. या ठिकाणावरून मार्गक्रमण होताना वाहनचालकांना चांगलीच कसरत करावी लागते.