खासगीकरणाविरोधात कामगार संघटनेचा एल्गार मोर्चा
मुलुंड (बातमीदार) ः महापालिकेतील सफाई, परिवहन, रुग्णालये आणि इतर खात्यांतील कायम कामगार आणि कंत्राटी कामगार यांच्या नोकऱ्या अबाधित राहाव्यात, यासाठी मंगळवारी (ता. १७) दुपारी २ वाजता एल्गार मोर्चा काढण्यात येणार आहे. आझाद मैदान येथे खासगीकरणाविरोधात विविध कामगार संघटनांतर्फे या मोर्चाचे आयोजन केले आहे.
बृहन्मुंबई महापालिकेने साफसफाई, परिवहन आणि रुग्णालय खात्यातील कामगारांच्या नोकऱ्या संपुष्टात आणून कंत्राटीकरण करण्याचे ठरविले आहे. त्याबाबतची निविदा १४ मे रोजी काढलेली आहे. ही निविदा रद्द न झाल्यास सफाई व परिवहन खात्याचे खासगीकरण होऊन कायमस्वरूपी नोकऱ्या संपुष्टात येतील. कामगार, कर्मचाऱ्यांच्या नोकऱ्या वाचविण्यासाठी आणि वारसाहक्क-अनुकंपा नोकरी अबाधित ठेवण्यासाठी आता संघर्ष अटळ आहे, असे पालिका कर्मचारी कामगार सेनेचे अध्यक्ष बाबा कदम यांनी सांगितले.