मुर्बी, धामोळे गावातील समस्या मार्गी लावणार
आमदार प्रशांत ठाकूर यांचे नागरिकांना आश्वासन
खारघर, ता. १६ (बातमीदार) : सिडकोकडून मुर्बी ग्रामस्थांसाठी भूखंड, संत रोहिदास समाजासाठी मंदिर आणि धामोळे पाड्यातील भाजीविक्रेत्यांना कायमस्वरूपी मार्केट उपलब्ध करून देण्यासाठी सर्वतोपरी प्रयत्न केला जाईल, असे आश्वासन आमदार प्रशांत ठाकूर यांनी मुर्बी आणि धामोळे ग्रामस्थांना दिले.
सिडकोने प्रकल्पग्रस्तांच्या जमिनीवर खारघर शहर निर्माण केले. दरम्यान, परिसरातील नागरी समस्यांकडे दुर्लक्ष केल्यामुळे नागरिकांना अडचणींचा सामना करावा लागत आहे. गावामध्ये समाजमंदिर नसल्यामुळे लग्नकार्य असो व इतर कार्यक्रम करण्यासाठी जागा किंवा खासगी सभागृह भाड्याने घ्यावे लागते. त्‍यामुळे मुर्बी गावातील सामाजिक कार्यकर्ते जगदीश ठाकूर यांच्या पुढाकाराने १३ जून रोजी रामशेठ ठाकूर पब्लिक स्कूलमध्ये आमदार प्रशांत ठाकूर यांच्यासोबत महत्त्वपूर्ण बैठकीचे आयोजन केले होते. या बैठकीत उपस्थित मुर्बी ग्रामस्थांनी गावासाठी समाजमंदिर व्हावे, यासाठी अनेक वेळा सिडको आणि पालिकेकडे पत्रव्यवहार केला. या वेळी सिडकोचे तत्कालीन सहव्यस्थापकीय संचालक दिलीप ढोले व इतर अधिकाऱ्यांनी लवकरात लवकर भूखंड उपलब्ध करून दिला जाईल, असे सांगितले होते. मात्र त्यांची बदली झाल्यामुळे समाजमंदिराचा प्रश्‍न जैसे थे आहे. तसेच खारघरमध्ये व्यवसाय करणाऱ्या चर्मकार समाजासाठी संत रोहिदास महाराज मंदिर व सभागृह उपलब्ध व्हावे, यासाठी मुख्यमंत्री दरबारी पत्रव्यवहार करण्यात आला. मात्र अद्याप त्‍याबाबतीत ठोस कार्यवाही झालेली नाही. तसेच पालिकेकडून चर्मकार व्यवसायासाठी स्टॉल परवाना मिळवून देण्यासाठी पुढाकार घ्यावा, धामोळे पाड्यातील पाणी समस्या दूर करून भाजी व्यवसाय करणाऱ्या ग्रामस्थांना ग्रामविकास भवन येथे कायमस्वरूपी मार्केट उपलब्ध करून देण्यात यावे, अशा विविध समस्यांविषयक या वेळी चर्चा झाली.