पालिकेच्या दवाखान्यात डॉक्टर नाही
पालिकेच्या भोंगळ कारभारावर नागरिक संतप्त
धारावी, ता.१५ (बातमीदार) : धारावी मुख्य रस्त्यावर पालिकेचा दवाखाना आहे. आसपासच्या विभागातील रहिवाशांना छोट्या-मोठ्या आजारांसाठी या दवाखान्याची मोठी मदत होते. धारावीतील सात विभागात असे सात दवाखाने आहेत. मात्र, या दवाखान्यांमध्ये अनेकदा डॉक्टर नसणे, काही औषधे वेळेवर उपलब्ध नसणे अशा अनेक अडचणींना स्थानिकांना तोंड द्यावे लागत आहे.
धारावीतील अनेक कुटुंबांना आर्थिक अडचणीमुळे खासगी डॉक्टरकडे जाणे परवडत नाही. त्यामुळे असे रहिवासी पालिकेच्या दवाखान्यात येतात. पालिकेच्या दवाखान्यातील उपचारामुळे रुग्णाला फरक पडतो, असा विश्वास असल्याने स्थानिक रहिवासी पालिकेच्या दवाखान्याला मोठ्या प्रमाणावर पसंती देतात. परंतु, शनिवारी (ता.१४) धारावी मुख्य रस्त्यावरील (बडी मशिदीसमोरील) पालिकेच्या दवाखान्यात रुग्ण विविध समस्या घेऊन येतात. मात्र, दवाखान्यात डॉक्टरच हजर नसल्याने रुग्ण व त्यांचे नातेवाईक परत जात होते. पालिकेच्या या भोंगळ कारभारावर रुग्ण व त्यांचे नातेवाईक संताप व्यक्त करत आहेत.
पालिका प्रशासनाने अनुपस्थित डॉक्टरच्या जागी दुसरा उपलब्ध करून देणे हे गरजेचे असताना असे होत नाही, असा सवाल स्थानिक रहिवासी व समाजसेवक पारी राजन यांनी केला आहे.

चौकशी करण्याचे आदेश
मी माहिती घेतो आणि पुढील कार्यवाही करतो. यासाठी मी माझ्या सहाय्यक आरोग्य अधिकारी यांना चौकशी करण्यास सांगितले आहे, असे ग/उत्तर पालिका आरोग्य अधिकारी डॉक्टर बाळासाहेब कवळे यांनी सांगितले.